काठमाडौँ । नेपाल चलचित्र कलाकार सङ्घको केन्द्रीय सदस्यमा राजेश गोसाईंले उम्मेदवारी दिनुभएको छ ।
आगामी जेठ ३ गते हुन थालेको एक्काइसौँ चुनावी साधारणसभामा सबिन श्रेष्ठको प्यानलबाट उहाँको उम्मेदवारी परेको हो ।
“कलाकारको आवाज, हाम्रो प्रतिबद्धता” नारासाथ चुनावी मैदानमा उत्रिएका गोसाईं भक्तपुरमा रहेर उम्मेदवारी दिनुभएको छ ।
श्रेष्ठको टिमबाट उपाध्यक्षमा पनाह अधिकारी र उद्धवप्रसाद भट्टराई, महासचिवमा रामेश्वर बुर्लाकोटी, सचिवमा पल्पसा डङ्गोल (चम्सुरी), कोषाध्यक्षमा पवित्रा आचार्य, सहकोषाध्यक्षमा पवन केसी तथा सदस्यमा विनोद भट्टराई, नवीन श्रेष्ठ, रश्मी भट्ट, नम्रता खरेल, सरिता राजोपध्याय, सुलेमान शङ्कर (इकु), छुल्टिम गुरुङ, श्यामकृष्ण श्रेष्ठ र सुपा खनालको पनि उम्मेदवारी परेको छ ।
अर्कोतर्फ उत्तम केसीको प्यानलबाट पनि “कलाकारको सुरक्षित भविष्य : हाम्रो जिम्मेवारी” नारासँगै पदाधिकारीका अतिरिक्त १७ जना सदस्यको उम्मेदवारी परेको छ ।
चुनावका लागि वैशाख २३ गते अन्तिम मतदाता नामावली प्रकाशन भएपछि वैशाख २७ गते उम्मेदवारको पनि अन्तिम नामावली भइसकेको छ । जेठ ३ गते मतदानसँगै सोही दिन मतगणना भएर विजयीको शपथ ग्रहण पनि हुने कार्यतालिका प्रकाशन भइसकेको छ ।
सङ्घका तीन सय २५ आजीवन सदस्य र दुई सय १७ नयाँ सदस्य रहेका छ । अहिलेको चुनावबाट १७ सदस्यीय केन्द्रीय समितिमा सात जना पदाधिकारी र १० जना सदस्य चयन हुन थालेका हुन् ।
