काठमाडौँ । संयुक्त राजनीतिक दलित संघर्ष समितिले सिन्धुली जिल्लामा भएको एक दलित युवकको मृत्यु प्रकरणप्रति गम्भीर ध्यानाकर्षण जनाउँदै घटनाको निष्पक्ष छानबिन र दोषीमाथि कडा कारबाहीको माग गरेको छ।

समितिले राष्ट्रिय सभाका अध्यक्ष मार्फत संघीय सचिवालयलार्य आज सोमबार बैशाख २१ गते एक ज्ञापनपत्र बुझाएको छ । उक्त ज्ञापनपत्रमा सिन्धुलीको सुनकोशी गाउँपालिका–५ का १६ वर्षीय युवकलाई प्रहरीले नियन्त्रणमा लिएपछि हिरासतमा मृत्यु भएको उल्लेख गरिएको छ । उक्त घटनालाई आत्महत्या भन्दै सार्वजनिक गरिएकोप्रति समितिले आपत्ति जनाउँदै यो घटनामा शंकास्पद रहेको र त्यसका लागि पर्याप्त आधार रहेको दलित संघर्ष समितिले जनाएको छ ।

ज्ञापनपत्रका अनुसार पक्राउ परेका युवकलाई प्रहरी हिरासतमा मानसिक तथा शारीरिक यातना दिइएको र त्यसकै कारण मृत्यु भएको हुन सक्ने आशंका गरिएको छ । परिवारलाई ढिला जानकारी गराइएको, घटनास्थलको अवस्था र पोस्टमार्टम प्रक्रियामा पारदर्शिता नदेखिएको भन्दै समितिले छानबिनमा गम्भीर प्रश्न उठाएको छ ।

समितिले घटनाको सत्यतथ्य सार्वजनिक गर्न उच्चस्तरीय छानबिन समिति गठन गर्न, संलग्न प्रहरी कर्मचारीमाथि कानुनी कारबाही गर्न तथा पीडित परिवारलाई उचित क्षतिपूर्ति र सुरक्षा प्रदान गर्न माग गरेको छ । साथै, देशभर दलित समुदायमाथि भइरहेका जातीय विभेद र हिंसाका घटनाहरू रोक्न प्रभावकारी कानुनी तथा नीतिगत व्यवस्था लागू गर्न सरकारसँग आग्रह गरिएको छ ।

ज्ञापनपत्रमा संविधानले सुनिश्चित गरेको समानता र सम्मानजनक जीवनको अधिकार कार्यान्वयन गर्न राज्य असफल भएको आरोप लगाउँदै यस्ता घटनाले विधिको शासन र मानवअधिकारको अवस्था कमजोर बनाएको उल्लेख गरिएको छ ।

समितिले घटनाको निष्पक्ष अनुसन्धान नभए आन्दोलनका थप कार्यक्रम घोषणा गर्ने चेतावनीसमेत दिएको छ ।

ज्ञापनपत्र राष्ट्रिय सभाका सदस्य तथा जातिय समता समाजका केन्द्रीय अध्यक्ष राजशे विक सहित विभिन्न संघ संस्थाका प्रतिनिधिहरूको उपस्थितिमा राष्ट्रिय सभाका अध्यक्ष नारायण दाहाललाई बुझाएको हो ।

ज्ञापनपत्रको पूर्ण पाठ :