काठमाडौं । चितवनको माडि नगरपालिका–९ कुसुमखोलामा चेपाङहरुको घरमा आगजनी गरिएको प्रति अखिल नेपाल सुकुम्बासी संघले कडा निन्दा गरेको छ । वर्षौंदेखि बसोवास गर्दै आएका सुकुम्वासी चेपाङ्हरुको घरमा आगो लगाएर मध्यबर्खामा विचल्लीमा पारेको भन्दै संघले आपत्ति जनाएको हो ।
बिहीबार युगदर्शनसँग कुरा गर्दै अध्यक्ष तुलसीराम सापकोटाले वैकल्पिक व्यवस्था नगरी सुकुम्बासीहरुलाई बसिरहेको स्थानबाट धपाउन खोजेर सरकारले कायरता प्रदर्शन गरेको बताउनुभएको छ । सापकोटाले उठिबास लगाएका चेपाङ समूदायको तत्काल वैकल्पिक व्यवस्था नगरे त्यस विरुद्ध आन्दोलनमा जाने चेतावनी दिनुभयो ।
‘उनीहरु २०५० सालदेखि त्यस स्थानमा बसोबास गरिरहेका छन् । राज्यले विकल्पविना त्यसरी आगो लगाएर उठिबास लगाउन खोज्नु कुनै पनि हालतमा सही होइन’ सापकोटाले भन्नुभयो, ‘तत्काल उनीहरुको बसोबासको व्यवस्था नमिलाए हामी त्यस विरुद्ध आन्दोलन गर्न बाध्य हुनेछौं ।’
अखिल नेपाल सुकुम्बासी संघले चितवन राष्ट्रिय निकुञ्जको विवेकहीन कार्यविरुद्ध कसरी जाने भन्नेबारे सरसल्लाह भइरहेको पनि जानकारी दिनुभयो ।
एकातिर विश्वव्यापी रुपमा फैलिएको कोरोना भाइरस जस्तो प्राणघातक रोगको संक्रमणबाट उच्च जोखिममा परेका र अर्कोतिर अविरल वर्षाका कारण बाढी पहिरो र डुबानमा परी कस्टपूर्ण जीवन बिताइरहेका अति गरिब तथा अति सिमान्तकृतत वर्गलाई राज्यले आधारभूत सेवा सुविधा उपलब्ध गराउनुपर्नेमा उल्टै उठिबास लगाउने कार्यको जति निन्दा गरे पनि कमै हुने सापकोटाको भनाई छ ।
घटना मानवअधिकारको उल्लंघनः एम्नेस्टी
चेपाङलाई वासस्थानबाट हटाउने र घरमा आगो लगाउने घटना मानवअधिकारको उल्लंघन भएको एम्नेस्टी इन्टरनेसनलले जनाएको छ ।एमनेस्टीले विज्ञप्ति जारी गरी उनीहरूलाई जबर्जस्ती हटाउने कार्य बन्द गर्न र घर जलाउने घटनामा संलग्नहरूलाई जवाफदेही बनाउन माग गरेको छ ।
एम्नेस्टी इन्टरनेसनल नेपालका निर्देशक नीराजन थपलियाले चेपाङका दुई घरमा आगो लगाइएको तथा आठ घर हात्ती प्रयोग गरेर भत्काइएकोमा आपत्ति जनाएका छन् । उनीहरूका लागि वैकल्पिक आवास र क्षतिपूर्तिको व्यवस्था गर्न पनि एम्नेस्टीले माग गरेको छ ।
यो पनिः चेपाङ किसानमाथि अमानवीय दुष्कार्यको किसान संगठनको विरोध
