काठमाडौँ । अखिल नेपाल किसान महासङ्घ (अप्फा) सहितका चार किसान सङ्गठनले चितवनको चेपाङ किसानप्रति चितवन राष्ट्रिय निकुन्ज प्रशासनद्वारा गरिएको अमानवीय दुष्कार्यको विरोध गरेका छन् । चेपाङ किसानका बस्तीलाई निकुन्ज प्रशासनले हात्ती लगाई घर भत्काउने तथा आगो लगाउनेजस्ता दुष्कार्य गरेपछि किसान सङ्गठनहरूले विरोध गरेका हुन् ।
अखिल नेपाल किसान महासङ्घ (अप्फा), अखिल नेपाल किसान महासङ्घ (क्रान्तिकारी), अखिल नेपाल किसान युनियन र अखिल नेपाल प्रगतिशील किसान सङ्घका प्रतिनिधिहरूको हस्ताक्षरमा २०७७ साउन ८ गते जारी प्रेसवक्तव्यमा यस्तो विरोध गरिएको हो ।
त्यसैगरी, धानरोपाइँको बेलामा समेत रासायनिक मल खरिदमा अनियमितता भएको समाचार आएकोबारेमा पनि चार किसान सङ्गठनहरूले दोषीउपर कारबाही तथा किसानलाई राहत, सुविधा र सहुलित प्रदान गर्न माग गरेका छन् ।
वक्तव्यको पूर्ण पाठ यस प्रकार छ :
“चितवनमा सीमान्तीकृत चेपाङ समुदायको घरमा हात्ती लगाएर घर भत्काउने, आगो लगाउने, तिनका जहान–परिवार र बालबच्चालाई यो चुहिँदो बर्खामा बिचल्लीमा पार्ने जुन दुष्कार्य गरिएको छ, त्यो गरिब किसानमाथिको गम्भीर हमला हो, अत्यन्तै अमानवीय र घोर निन्दनीय दुष्कार्य हो । हामी चार किसान सगठनहरू अखिल नेपाल किसान महासङ्घ (अप्फा), अखिल नेपाल किसान महासङ्घ (क्रान्तिकारी), अखिल नेपाल किसान युनियन र अखिल नेपाल प्रगतिशील किसान सङ्घ कम्युनिस्ट नामको किसानमारा यस्तो अमानवीय दुष्कार्यको तीव्र भत्र्सना गर्दछाँै र गरिब किसानका घर उजाड्ने अपराधीमाथि कडा कारबाही, घरबार उजाडिएका चेपाङ परिवारलाई पर्याप्त क्षतिपूर्ति देऊ, पीडित किसान परिवारसँग क्षमायाचना गर र यस्ता अमानवीय घटना दोहोरिन नदेऊ भन्ने जोडदार माग गर्दछौँ ।
यसका अतिरिक्त धानरोपाइँ गर्ने बेलामा रासायनिक मल किन्ने क्रममा करोडौँको घोटाला गरिएको भन्ने कुरा प्रकाशमा आएको छ । यसको छानबिन होस् र घोटाला गर्ने जोसुकै भए पनि कडा कारबाही गरियोस र किसानलाई राहत, सुविधा र सहुलियत प्रदान गरियोस् भन्ने पनि जोडदार माग गर्दछौं ।”
