काठमाडौँ । रास्वपा वास्तवमा अमेरिकाद्वारा सञ्चालित भएको र अमेरिका कै फन्डीङ्ग, बलबुता र प्रभावमा त्यो पार्टीको निर्माण भएको राष्ट्रिय जनमोर्चाका महासचिव मनोज भट्टले बताउनु भएको छ ।

भट्टले मंगलबार राष्ट्रिय प्रेस कलब अनाम नगरले आयोजना गरेको पत्रकार भेटघाट कार्यक्रममा पार्टीको धारणा राख्दै सो धारणा राख्नुभएको हो ।

काँग्रेस, एमाले र माओवादी एकचीन नीतिबाट बाहिर आउन नसक्ने अवस्था देखेपछि स्वयंं अमेरिका कै फन्डीङ्ग, बलबुता र प्रभावमा राष्ट्रिय स्वतन्त्र पार्टीको निर्माण भएको भट्टले बताउनु भयो ।

‘स्वतन्त्र पार्टीको सबै गतिविधि हेर्दा चाहे त्यो एमसिसीको सवालमा वा परराष्ट्र नीतिको सवालमा प्रष्ट दृष्टिकोण छैनन् । रास्वपा चुनावमा विजय हुँदा चीनले बधाई दिएको छ, त्यो पार्टीले पनि जवाफ फर्काएको छ तर परराष्ट्र नीति के हो बोल्न सकेको छैन ।’

भट्टले भन्नुभयो– ‘तपाईंहरू वास्तवमा अमेरिकाद्वारा सञ्चालित हुनुहुन्छ र परराष्ट्र नीतिको सवालमा तपाईंहरु क्लियर हुनुहुन्न । चीनविरोधी शक्तिको रुपमा अमेरिकाले तपाईहरूलाई प्रयोग गर्ने हो ।’

रास्वपाको परराष्ट्र नीति स्पष्ट नभएको महासचिव भट्टको भनाइ छ । उहाँले रास्वपा कुनै पनि राष्ट्रको हितमा प्रयोग नहोस् भनेर आफ्‌नो पार्टीले खबरदारी गर्न लागेकोसमेत बताउनु भयो ।

अमेरिकालाई काँग्रेस, एमाले र माओवादीबाट आफ्‌नो स्वार्थ पुरा हुनेमा विश्वास नभएको भट्टले बताउनु भयो– ‘उनीहरू पनि अमेरिकाले भनेको नीति भन्दा बाहिर छैनन् । शुरुमा एमसिसी स्वीकार गरे, पछि एसपिपी अस्वीकार गरे ।’ भट्टले अगाडि भन्नुभयो– ‘उनीहरू एकचीन नीतिको पक्षमा छन् । अमेरिकाको भनाईलाई मानेर चीन विरोधी गतिविधि गर्न तयार छैनन् ।’

त्यसैको परिणाम फागुन २१ गते सम्पन्न चुनावमा काँग्रेस, एमाले र माओवादीले हारको सामना गर्नु परेको भट्टले जोड दिनुभयो ।