बागलुङबजार । बागलुङ–१ मा प्रगतिशील लोकतान्त्रिक पार्टीका उम्मेदवार चित्र सापकोटाले आफ्नो उम्मेदवारी निष्कृय बनाएका छन् ।
२०८२ फागुन १८ गते प्रलोपाको बागलुङ जिल्ला समितिले वक्तव्य जारी गर्दै सो जानकारी दिएको हो ।
जिल्ला अध्यक्ष कृष्ण शर्मा र उम्मेदवार सापकोटाको हस्ताक्षरमा जारी वक्तव्यमा बागलुङ–१ मा उम्मेदवारी फिर्ता लिइएकाले समानुपातिकतर्फ मात्रै मत दिन अपिल गरिएको छ ।
चुनावी प्रचारप्रसारको क्रममा मतदाताको मनोविज्ञानलाई ध्यानमा राख्दै बागलुङ निर्वाचन क्षेत्र नम्बर १ मा प्रत्यक्षतर्फका उम्मेदवारी निष्क्रिय गरिएको जानकारी दिइएको छ ।
पार्टीले लोकतान्त्रिक प्रणालीको सुदृढीकरण, राष्ट्रिय स्वाधीनताको रक्षा, सुशासन तथा समृद्ध राष्ट्र निर्माणका लागि मतदातालाई आफ्नो विवेक प्रयोग गरी मतदान गर्न अपिल गरेको छ ।
युगदर्शनलाई प्राप्त जानकारीअनुसार प्रलोपाले राष्ट्रिय जनमोर्चा र नेपाली कम्युनिस्ट पार्टीका साझा उम्मेदवार कृष्णप्रसाद शर्मा अधिकारीलाई समर्थन गर्ने गरी सापकोटाले उम्मेदवारी फिर्ता गरिएको हो ।
स्रोतले भन्यो– ‘राष्ट्रिय जनमोर्चा र नेपाली कम्युनिस्ट पार्टीका साझा उम्मेदवार कृष्णप्रसाद शर्मा अधिकारीलाई समर्थन गर्ने गरी प्रगतिशील लोकतान्त्रिक पार्टीले आफ्नो उम्मेदवारी फिर्ता लिएको हो ।’
त्यस्तै, साझा उम्मेदवार अधिकारीले सापकोटाको उम्मेदवारी फिर्ता गर्ने निर्णयलाई स्वागत गर्नुभएको छ ।
‘मेरो प्रिय मित्र चित्र सापकोटा, जो प्रलोपाबाट उम्मेदवार हुनुहुन्थ्यो, उहाँले आफ्नो उम्मेदवारी हापेको खबरले हामी उत्साहित छौ’ अधिकारीले सामाजिक सञ्जालमा लेख्नुभएको छ– ‘उहाँले आफ्नो मित्रवत धर्म पूरा गर्नुभएको छ । समयले उहाँको यो निर्णयलाई मूल्याङ्कन गर्नेछ ।’
अधिकारीले अगाडि लेख्नुभएको छ– ‘अब बलेवामा वामगठबन्धनको एकल उम्मेदवारी रहनेछ । मतदाताले आफ्नो उच्च स्वविवेक प्रयोग गरेर मतदान गर्नुहुनेछ । हामी हितैषी मित्र चित्र सापकोटाको यो निर्णयप्रति आभारी छौँ ।’
