रौतहट । चन्द्रपुर नगरपालिका अन्तर्गत विभिन्न विद्यालयहरूमा कार्यरत नगर शिक्षक तथा स्वयंसेवक शिक्षकहरूले १३ महिनादेखि तलब नपाउँदा उनीहरूको परिवारले आर्थिक समस्याको मार खेप्नु परिरहेको छ ।

स्थानीय निकायद्वारा करारमा नियुक्ति भएका शिक्षकहरूले नियमित रूपमा विद्यालयमा उपस्थित भई पठन–पाठन कार्य गर्दै आएका छन् । तर पनि लामो समयसम्म तलब नपाउँदा दैनिक जीवनयापन, परिवारको खर्च, स्वास्थ्य तथा अन्य आवश्यकताहरू पूरा गर्न कठिनाइ भइरहेको एक शिक्षकले युगदर्शनलाई बताए । उनको अनुसार लामोसमयसम्म तलब नपाउँदा शिक्षकहरूको मनोबलमा समेत नकारात्मक असर पारेको छ ।

‘हाम्रो यो जायज मागलाई मध्यनजर गर्दै विगत १२–१३ महिनादेखि रोकिएको सम्पूर्ण तलब भत्ता यथाशीघ्र निकासा गरिदिनुहुन तथा भविष्यमा यस्तो समस्या दोहोरिन नदिन आवश्यक व्यवस्था मिलाइदिनुहुन हार्दिक अनुरोध गर्दछौँ ।’ उनले भने– ‘हामी नगर शिक्षक तथा स्वयंसेवक शिक्षकहरू भोलि मितिदेखि पठन–पाठन कार्यमा सहभागी हुन नसक्ने अवस्था रहने व्यहोरा जानकारी गराउँदछौँ । यसबाट विद्यार्थीको पठन–पाठनमा पर्नसक्ने असरको सम्पूर्ण जिम्मेवारी नगर प्रमुख तथा नगर शिक्षा अधिकारीले लिनुपर्ने व्यहोरा समेत अवगत गराउँदछौँ ।’

नगर शिक्षक तथा स्वयंसेवक शिक्षकहरू उक्त बेहोरा उल्लेख गरिएको ज्ञापन पत्र नगर प्रमुखलाई बुझाएका छन् ।