काठमाडौँ । नेकपा (मसाल) ले भारतको नेल्लोरमा कार्यरत ठाकुरप्रसाद केसीप्रति श्रद्धाञ्जली व्यक्त गरेको छ ।
महामन्त्री मोहनविक्रम सिंहको हस्ताक्षरमा २०८२ पुस २२ गते मङ्गलबार शोकवक्तव्य जारी गर्दै पार्टीले श्रद्धाञ्जली तथा शोकसन्तप्त परिवारजनप्रति समवेदना व्यक्त गरेको हो ।
वक्तव्यमा जनाइएअनुसार केसी मसालको पार्टीसदस्य हुनुहुन्थ्यो । उहाँ मूल प्रवाह अखिल भारत नेपाली एकता समाजको पनि केन्द्रीय सल्लाहकार हुनुहुन्थ्यो ।
केसीको निधनबाट मसालको आन्दोलनलाई गम्भीर क्षति पुगेको धारणा राखिएको शोकमन्तव्यको पूर्ण पाठ यस्तो छ :
“प्युठान जिल्ला माण्डवी–३ निवासी हाल दक्षिण भारतको नेल्लोरमा श्रमरत कामरेड ठाकुरप्रसाद केसी (का. हिमाल) को २०८२ पुस २१ गते तदअनुसार जनवरी ५, २०२६ का दिन मृत्यु भएको छ । हामीले उहाँको मृत्युप्रति गहिरो दु:ख व्यक्त गर्दै सन्तप्त परिवारजनप्रति हार्दिक समवेदना प्रकट गर्दछौँ ।
कामरेड ठाकुरप्रसाद केसी हाम्रो पार्टीको सदस्य हुनुहुन्थ्यो । उहाँ भारतस्थित नेपालीहरूको सर्वप्रिय सङ्गठन मूल प्रवाह अखिल भारत नेपाली एकता समाजमा लामो समयसम्म कार्यरत रहनुभएको थियो । उहाँले हाम्रो पार्टीका विभिन्न तहका समितिमा रहेर सक्रियतापूर्वक आफ्नो जिम्मेवारी पूरा गर्नुभएको थियो । उहाँ हाम्रो पार्टीको अनुशासित, सक्रिय, जुझारु, कर्तव्यनिष्ठ र प्रतिबद्ध सदस्य हुनुहुन्थ्यो । उहाँको मृत्युबाट हाम्रो पार्टीको आन्दोलनमा गम्भीर क्षति भएको छ ।
अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।”
