काठमाडौँ । नेपाली कम्युनिस्ट पार्टीका नेता झलनाथ खनालकी पत्नी रविलक्ष्मी चित्रकारसँग नेकपा (मसाल) का महामन्त्री मोहनविक्रम सिंहले भेट गर्नुभएको छ ।
चित्रकारलाई २०८२ पुस १० गते बिहीबार काठमाडौँमा डल्लुमा पुगेर महामन्त्री सिंहले भेट गर्नुभएको थियो ।
सिंहसँगै राष्ट्रिय जनमोर्चाका केन्द्रीय उपाध्यक्ष तथा प्रवक्ता दुर्गा पौडेल र राजमो नेता वासु पोखरेलको पनि सहभागी हुनुहुन्थ्यो ।
जेनजी प्रदर्शनको क्रममा भदौ २४ गते डढेर गम्भीर घाइते भएकी चित्रकार हालै भारतमा उपचार गराएर फर्केपछि महामन्त्री सिंहले स्वास्थ्यलाभको कामना गर्न सो भेटघाट गरेको राजमो नेता पोखरेलले युगदर्शनलाई जानकारी दिनुभयो ।
भेटघाटमा खनाल पनि सँगै हुनुहुन्थ्यो । भेटमा महामन्त्री सिंहले चित्रकारको स्वास्थ्यसम्बन्धी चासो व्यक्त गर्नुभएको थियो ।
डल्लु निवास डढेर पूरै ध्वस्त भएपछि खनाल परिवार घरबहालमा बसिरहेको पोखरेलले बताउनुभयो ।
भेटघाटमा खनालले रासायनिक पदार्थको प्रयोग गरेर आफ्नो निवास ध्वस्त पारिएको, तालिमप्राप्तजस्तो देखिने जत्थामध्ये केहीले ढुङ्गा हान्ने तथा केहीले आगलागीजस्ता विध्वंसात्मक कार्य गरेको जानकारी दिनुभएको थियो ।
पेसाले शिक्षण पेसामा रहनुभएकी चित्रकारलाई आगजनीबाट बचाउन छिमेकीको घरतर्फबाट उद्धार गरिएको थियो ।
