काठमाडौँ । नेपाल कम्युनिष्ट पार्टी (एमाले) ले ११औँ राष्ट्रिय महाधिवेशन शुरु हुन दुईदिन बाँकि छ । एमालेलाई थप सशक्त बनाउनुपर्नेमा नेताहरूले जोड दिएका छन् ।
महाधिवेशनका सन्दर्भमा विहीबार अपरान्ह आयोजित अन्तरसंवाद कार्यक्रममा पोलिटब्युरो सदस्य पुरुषोत्तम पौडेलले पार्टीभित्रको एकताले मात्रै मुलुकमा विद्यमान संकट समाधान गर्न सकिने र त्यसका लागि आन्तरिक लोकतन्त्र व्यवस्थित बनाउन नेतृत्व हस्तान्तरण हुनुपर्ने बताए ।
जेन–जी युवाको आन्दोलनपछि विकसित राजनीतिक तथा संवैधानिक संकटको सामना तथा उनीहरूको भावनाको सम्मान गर्न नेतृत्व हस्तान्तरणको विकल्प नरहेको पौडेलको भनाई छ ।
यस्तै पोलिटब्युरो सदस्य डा. विमला पौडेल राईले बहुदलीय जनवादको सिद्धान्त स्थापित गर्न तथा अन्तरपार्टी लोकतन्त्रलाई संस्थागत गर्न नेतृत्व हस्तान्तरण गर्नुपर्ने बताएका छन् ।
पोलिटब्युरो सदस्य ठाकुर गैरेले एमाले पार्टीमा विद्यमान व्यक्तिवादी चिन्तन अन्त्य गर्न नयाँ नेतृत्व आवश्यक भएको उल्लेख गरे ।
केन्द्रीय सदस्यहरू हरि राई, युवराज बाँस्कोटा र रामलाल साहले पनि नयाँ नेतृत्व अपरिहार्य रहेकाले बताए ।
सचिवालय बैठक बस्दै
महाधिवेशनको संघारमा रहेको नेकपा एमालेको सचिवालय बैठक आज बस्दैछ । पार्टी मुख्यालय च्यासलमा दिउँसो १ बजे सचिवालय बैठक बस्न लागेको हो ।
स्रोतकाका अनुसार केन्द्रीय कमिटी, स्थायी समिति र पदाधिकारीको संख्या बढाउन विधान संशोधन प्रस्ताव लगिदैछ । तर, वरिष्ठ उपाध्यक्ष ईश्वर पोखरेल पक्षधरले भने विधान महाधिवेशनको निर्णय उल्ट्याउन नहुने अडान लिदै आएको छ ।
