काठमाडौँ । जेनजी आन्दोलनलाई भड्काएको आरोपमा समातिएका टिओबी समूहका तेन्जिन दाबा विरुद्ध लागुऔषधदेखि नागरिकता र राहदानी कीर्तेसम्मको मुद्दा दर्ता भएको छ ।

जिल्ला प्रहरी परिसर काठमाडौँले करिब तीन महिना लामो अनुसन्धानपछि जिल्ला सरकारी वकिल कार्यालयमा अनुसन्धान फाइल बुझाएसँगै कार्यालयले तेन्जिन विरुद्ध काठमाडौँ जिल्ला अदालतमा मुद्दा दर्ता गरेको हो ।

उनी विरुद्ध अहिले लागुऔषधको कसुरका साथै लिखत कीर्तेसम्बन्धी कसुरमा मुद्दा दायर गरिएको छ । उनको कोठाबाट गाँजा बरामद भएकाले लागुऔषधको कसुरमा पनि मुद्दा चलाइएको प्रहरीको दाबी छ ।

तेन्जिनबाट प्राप्त नागरिकता, राहदानी, राष्ट्रिय परिचयपत्रसमेत कीर्ते भेटिएकाले लिखतसम्बन्धी कसुरमा मुद्दा दायर भएको छ । गलत विवरण पेस गरेर तेन्जिनले काठमाडौँ जिल्ला प्रशासन कार्यालयबाट नागरिकता लिएको, त्यही नागरिकताको आधारमा राष्ट्रिय परिचयपत्र र राहदानी बनाएको आरोप उनीमाथि छ । सोहीअनुसार उनी विरुद्ध नागरिक कीर्ते, राहदानी किर्ते र राष्ट्रिय परिचयपत्र कीर्ते कसुरमा पनि मुद्दा दायर गरिएको हो ।

तिब्बतियन मूलका तेन्जिनले आफ्नो नागरिकतामा बाबुको नाम कृष्णबहादुर लामा उल्लेख गरेका थिए तर बाबु भनिएका व्यक्तिले समेत तेन्जिनलाई नचिन्ने बताएपछि नागरिकता गलत विवरण पेस गरेर लिएको खुलेको हो ।

यसअघि उनी विरुद्ध अभद्र व्यवहारको मुद्दा चलाइएको थियो । त्यति बेला उनी काठमाडौँ जिल्ला प्रशासन कार्यालयबाट सात हजार पाँच सय धरौटी माग भएको थियो तर लागुऔषध र कीर्तेको अनुसन्धान जारी रहेकाले प्रहरीले उनलाई हिरासतमै राखेको थियो ।

जेनजी आन्दोलनमा घुसपैठ गरेको आरोपमा अनुसन्धान राडरमा रहेको टिओबी समूहको साइनो फ्री तिब्बतसँग नभएको प्रहरीले निष्कर्ष निकालेको छ । तीन महिना लामो अनुसन्धानपछि यो समूहको फ्री तिब्बतसँग कुनै साइनो नरहेको सन्देश दाबी गरेको छ ।

जेनजी आन्दोलनका बेला टिओबीको सक्रियतासँगै उत्तरी छिमेकी चीनले समेत नेपाल सरकारसँग यससम्बन्धी बाहिरिएका सूचनाबारे आफूहरूले ‘केयरफुल अब्जरभेसन’ चलाइरहेको भन्दै छानबिनको प्रगतिबारे चासो राखेको थियो । चिनियाँ चासोपछि सरकारले अनुसन्धान चलिरहेको अनि छिटै सत्य तथ्य बाहिर आउने जवाफ दिएको थियो ।

असोज २६ गते यो समूहका मुख्य व्यक्ति तेन्जिन दाबा लामालाई पक्राउ गरी अनुसन्धान गरेको प्रहरीले तेन्जिनबाहेक यसका अन्य सदस्यसमेत तिब्बती मूलका नरहेको प्रष्ट बताएको छ । टिओबी (तिब्बती ओरिजिनल ब्लड) लेखेको टिसर्ट लगाउने व्यक्ति पनि तेन्जिनबाहेक अरू फेला नपरेको पनि प्रहरीको भनाइ छ ।

यो समूहका अन्य सदस्यले टिओबीलाई द ओरिजिनल ब्रदर्सको रूपमा लिने गरेको पनि प्रष्ट पारेका छन् । गत २३ र २४ भदौमा भएको बुलेट बाइक पड्काउँदै हिँडेको यो समूहले बाइकर्स ग्रुपकै समूह रहेको प्रहरीले बताएको छ ।

धरौटीमा रिहा

यसैबिच तेन्जिङ पाँच लाख २० हजार धरौटीमा रिहा भएका छन् । प्रहरीद्वारा विभिन्न तीन अभियोगसहित काठमाडौँ जिल्ला अदालतमा पेस गरिएका दाबालाई धरौटीमा रिहा गर्न अदालतले आदेश दिएको जिल्ला प्रहरी प्रवक्ता एसपी पवनकुमार भट्टराईले बताए ।

भदौ २३ गते १२ बजे बिजुलीबजार पुगेर बाइक पड्काउँदै नाराजुलुस गर्नुका साथै दावा सम्मिलित समूहले भिडलाई उत्तेजित गर्ने काम गरेको प्रहरीले जनाएको छ ।

आफूलाई आधा तिब्बेतियन भएको कुरा प्रहरीलाई भनेको र सो समूहमा तेन्जिनबाहेक अरू सबै सदस्य नेपाली मूलको भएको खुलेको प्रहरीको भनाइ छ । हिरासतमा रहेका तेन्जिनले आफूले िीडमा गएर उत्तेजित गर्ने काम गरेर गल्ती गरेको प्रहरीलाई बताएका थिए ।