काठमाडौँ । बागलुङ जैमिनी नगरपालिका–८ निवासी नन्दकला थापाको निधनप्रति नेकपा (मसाल) ले श्रद्धाञ्ज्ली व्यक्त गरेको छ ।
महामन्त्री मोहनविक्रम सिंहको हस्ताक्षरमा २०८२ मङ्सिर १८ गते बिहीबार शोकवक्तव्य जारी गर्दै मसालले श्रद्धाञ्जली तथा शोकसन्तप्त परिवारप्रति समवेदना व्यक्त गरेको हो ।
वक्तव्यमा स्मृतिशेष थापा मसालको पार्टी सदस्य रहेको र उहाँको टेकनाम अनिता रहेको जानकारी दिइएको छ ।
अनुशासित, सक्रिय, जुझारु, कर्तव्यनिष्ठ र प्रतिबद्ध थापाको निधनबाट मसालको आन्दोलनको क्षति पुगेको पनि वक्तव्यमा जनाइएको छ ।
यस्तो छ, शोकवक्तव्यको पूर्ण पाठ :
“बागलुङ जिल्ला जैमुनी नगरपालिका–८ निवासी कामरेड नन्दकला थापा (का. अनिता) को आज २०८२ मङ्सिर १८ गते निधन भएको छ । हामीले उहाँको मृत्युप्रति गहिरो दु:ख व्यक्त गर्दै शोकसन्तप्त कामरेड कुलबहादुर थापा (उहाँका पति) सहित उहाँको सम्पूर्ण परिवारप्रति हार्दिक सहानुभूति तथा समवेदना व्यक्त गर्दछौँ ।
कामरेड नन्दकला हाम्रो पार्टीको सदस्य हुनुहुन्थ्यो । उहाँ भारतस्थित नेपालीहरूको सर्वप्रिय सङ्गठन मूल प्रवाह अखिल भारत नेपाली एकता समाजमा लामो समयसम्म कार्यरत रहनुभएको थियो । उहाँले हाम्रो पार्टीका विभिन्न तहका समितिमा रहेर सक्रियतापूर्वक आफ्नो जिम्मेवारी पूरा गर्नुभएको थियो । उहाँ हाम्रो पार्टीको अनुशासित, सक्रिय, जुझारु, कर्तव्यनिष्ठ र प्रतिवद्ध सदस्य हुनुहुन्थ्यो । उहाँको मृत्युबाट हाम्रो पार्टीको आन्दोलनमा गम्भीर क्षति भएको छ ।
अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।”
