काठमाडौँ । नेपाल कम्युनिस्ट पार्टी (मसाल) का महामन्त्री मोहनविक्रम सिंहले बुर्जुवा चिन्तनबाट मुक्त नभईकन क्रान्तिकारी कम्युनिस्ट आन्दोलन अगाडि बढ्न नसक्ने धारणा व्यक्त गर्नुभएको छ ।
२०८२ मङ्सिर १४ गते आइतबार काठमाडौँको दरबारमार्गस्थित एक होटलमा जर्मन कम्युनिस्ट पार्टी (एमएलपिडी) को नेताहरू स्टेफन एङ्गेल र मोनिका गार्टनरद्वारा लिखित पुस्तकको परिचर्चा कार्यक्रममा मन्तव्य राख्दै उहाँले सो धारणा व्यक्त गर्नुभएको हो ।
‘बुर्जुवा सामाजिक विज्ञान, धर्म र संस्कृतिको सङ्कट’ शीर्षकमा अङ्ग्रेजी भाषाको पुस्तकबारे सङ्क्षिप्त मन्तव्य राख्दै उहाँले भन्नुभयो– ‘बुर्जुवा चिन्तनबाट मुक्त नभईकन कुनै पनि देशको क्रान्तिकारी कम्युनिस्ट आन्दोलन अगाडि बढ्न सक्दैन ।’
महामन्त्री सिंहले सैद्धान्तिक सङ्घर्ष कम्युनिस्ट पार्टीका लागि धेरै नै महत्त्वपूर्ण विषय रहेको बताउनुभयो ।
‘लेनिनले भन्नुभएको छ, क्रान्तिकारी सिद्धान्तविना कम्युनिस्ट आन्दोलन अगाडि बढ्न सक्दैन’ उहाँले भन्नुभयो– ‘कम्युनिस्ट आन्दोलनलाई अगाडि बढाउन माक्र्सवादी–लेनिनवादी दर्शनको आधारमा अगाडि बढ्नुपर्दछ । त्यसका लागि अध्ययन संस्कृतिलाई प्रवद्र्धन गर्नुपर्दछ ।’
सो अवसरमा उहाँले एमएलपिडीले सैद्धान्तिक–वैचारिक विषयमा अध्ययन अगाडि बढाएको भन्दै त्यसको प्रशंसा गर्नुभयो ।
उहाँले भन्नुभयो– ‘एमलपिडीले सैद्धान्तिक–वैचारिक विषयमा प्रशस्त ध्यान दिएको छ । यो राम्रो विषय हो ।’
यता नेपालमा भने सिद्धान्त र विचारको अध्ययनमा ध्यान नपुगेको गुनासो उहाँले गर्नुभयो ।
‘हाम्रा कैयौँ कार्यकर्ताले पुस्तक, पत्रपत्रिकाको अध्ययनमा ध्यान दिँदैनन्’ उहाँले भन्नुभयो– ‘यहाँसम्म कि पार्टीप्रकाशनको अध्ययनमा समेत हाम्रा नेताकार्यकर्ताको कम ध्यान जाने गरेको छ ।’
महामन्त्री सिंहले नेपालका कम्युनिस्टले अध्ययन संस्कृतिको विकास गर्न एमलपिडीबाट शिक्षा लिनुपर्ने आवश्यकता रहेको बताउनुभयो ।
उहाँले भन्नुभयो– ‘एमएलपिडीले कुनै सैद्धान्तिक पुस्तक प्रकाशन भयो भने तलैसम्म त्यसबारे परिचर्चा कार्यक्रम सञ्चालन गर्दछ । यो राम्र्रो पक्ष हो । हामीले अध्ययन संस्कृतिको विकास गर्ने उनीहरूको यो तरिकाबाट शिक्षा लिनुपर्दछ ।’
मन्तव्यको क्रममा उहाँले अहिले चर्चा गरिएको पुस्तकले बुर्जुवा वर्गसितको सङ्घर्ष खालि राजनीतिक क्षेत्रबाट नभएर विज्ञान, धर्म, संस्कृति सबै क्षेत्रमा चल्ने बताउनुभयो ।
