थम्मन थापा, गल्कोट (बागलुङ) ।
बागलुङको गलकोट नगरपालिका र ताराखोला गाउँपालिकाबाट राजधानीमा बसोबास गर्दै आएका नागरिकले आफ्नो क्षेत्रका समसामयिक समस्याबारे भौतिक पूर्वाधार तथा यातायात, ऊर्जा, जलस्रोत तथा सिँचाइ एवम् सहरी विकासमन्त्री कुलमान घिसिङलाई ध्यानाकर्षण गराएका छन ।
२०८२ मङ्सिर १२ गतेका दिन मन्त्री घिसिङलाई उक्त ज्ञापन बुझाइएको हो ।
जेनजी आन्दोलनपछि निर्माण भएको सरकारका मन्त्री घिसिङलाई मध्यपहाडी लोकमार्गको बागलुङ बिहुँ खण्ड कालोपत्रे लामो समय बितिसक्दा समेत नभएको, अन्तर्राष्ट्रिय गलकोट मूर्तिकलासम्म कालोपत्रे सडक निर्माण, गलकोट ताराखोला सहज यातायात अनि निशुल्क एम्बुलेन्स सेवा, स्थानीय तहको बजेटले सम्भव नभएका स्थानमा सङ्घीय सरकारमार्फत खानेपानी योजनामा आवश्यक बजेट, गलकोट नगरपालिका ७ नं वडा कार्यालयको भवन निर्माणको लागि आवश्यक बजेट विनियोजन, गल्याङ पचुवा मोटरेबल पुल निर्माणले निरन्तरता नपाएको, यस क्षेत्रको पर्यटन, पर्यावरण र भइरहेको विकास निर्माणका काममा दिगोपन सँगै गुणस्तरीयतालाई मध्यनजर गर्दै कार्यसम्पादन हुनुपर्नेलगायतका विषयमा ध्यानाकर्षण गराइएको समाजसेवी मिलन केसीले जानकारी दिए ।
मध्यपहाडी लोकमार्गको बागलुङ घोडाबाँधे खण्डले अपेक्षित सकारात्मक गति लिन नसक्दा त्यसको प्रत्यक्ष असर पर्यटन क्षेत्रमा परेको भन्दै ध्यानाकर्षण गराइएको गलकोट नगरपालिका वडा नं ७ का वडा अध्यक्ष राजबहादुर थापाले बताए ।
ध्यानाकर्षणपत्र ग्रहण गर्दै मन्त्री घिसिङले सम्बन्धित कार्यालय र निकायलाई यथाशीघ्र यी विषयमा कार्यसम्पादन गर्न निर्देशन दिएको बताइएको छ ।
मन्त्री घिसिङले नागरिकसँग आवश्यक सहकार्य गर्दै अघि बढ्नेसमेत विश्वास व्यक्त गरे ।
उहाँले मागपत्रमा प्रस्तुत विद्यमान समस्या समाधानका लागि आफ्नो तर्फबाट आवश्यक पहल र कार्यसम्पादन हुने बताए ।
कार्यक्रममा गलकोट घुम्टे विकास मञ्च, बागलुङ गलकोट महिला समूह, गलकोट समाज, ताराखोला समाज, बागलुङ समाज भक्तपुरका प्रमुख तथा प्रतिनिधिसहित समाजसेवी र सरोकारवालाको उपस्थिति रहेको थियो ।
