गोपालप्रसाद भट्टराई, सन्धिखर्क ।
नेकपा (मसाल) का महामन्त्री मोहनविक्रम सिंहले अब हुने निर्वाचनमा राष्ट्रिय जनमोर्चा एक्लै चुनाव लड्ने बताउनुभएको छ ।
विगतका चुनावी एकतामा सहयात्री दलको राजनीतिक बेइमानी र पछिल्लो घटनाक्रमले राजनीतिक सहकार्य नगर्ने निर्णयमा पुगिएको महामन्त्री सिंहको भनाइ थियो ।
२०८२ कात्तिक २७ गते बिहीबार सन्धिखर्कमा सम्पन्न राष्ट्रिय जनमोर्चाको अगुवा नेताकार्यकर्ता प्रशिक्षण कार्यक्रमलाई सम्बोधन गर्दै उहाँले यस्तो बताउनुभएको हो ।
जेनजी आन्दोलनले ओली नेतृत्वको सरकारलाई पतन गराए पनि युवाहरू आफै गन्तव्यहीन भएको महामन्त्री सिंहको तर्क छ ।
स्पष्ट विचारसहितको सङ्गठनविना गरिएको आन्दोलनलाई अमेरिका, भारतको साम्राज्यवाद र स्वतन्त्र तिब्बतका एजेन्टले उपयोग गरी दिशाविहीन बनाइदिएको उहाँले बताउनुभयो ।
‘अमेरिका, भारत र स्वतन्त्र तिब्बतका स्वार्थ समूहले जेनजीलाई प्रयोग गरे । माओवादी, राजावादी र रास्वपाले समेत युवा उचाले’ महामन्त्री सिंहले भन्नुभयो– ‘जसको परिणामले देश अझ राजनीतिक खाडलमा फस्यो ।’
अहिले पनि नेपाललाई अस्थिरतामा झुलाएर फाइदा उठाउने देशी तथा विदेशी प्रतिक्रियावादीको चलखेल र डिजाइन भइरहेको महामन्त्री सिंहको दाबी छ ।
राष्ट्रभक्त शक्ति सबै एक ठाउँमा उभिएर देश र संविधानको रक्षा गर्नुपर्ने, सङ्घीय व्यवस्था तत्काल खारेज गरी देशलाई निकास दिनुपर्ने र सबल नेपाल निर्माणमा जिम्मेवार ढङ्गले लाग्नुपर्नेमा उहाँको जोड छ ।
अर्घाखाँचीका छओटै पालिकाबाट करिब दुई सय अगुवा नेताकार्यकर्ताको सहभागितामा सम्पन्न कार्यक्रममा राजमो नेताहरू शेरबहादुर बिसी, बासुदेव पोख्रेल, झविलाल थापालगायले पनि प्रशिक्षणात्मक भनाइ राख्नुभएको थियो ।
कार्यक्रम राजमो जिल्ला अध्यक्ष थम्मन केसीको अध्यक्षता र सचिव बाबुराम पन्थीको सञ्चालनमा सम्पन्न भएको हो ।
