काठमाडौँ । राष्ट्रिय जनमोर्चाका केन्द्रीय सल्लाहकार तथा वामपन्थी नेता आनन्द शर्माले भ्रष्टाचारको विरुद्ध लड्ने एक मात्र पार्टी राजमो भएको दाबी गर्नुभएको छ ।
२०८२ कात्तिक २८ गते शुक्रबार अखिल नेपाल जनजाति सम्मेलन काठमाडौँले चाबहिलचोकमा आयोजना गरेको पाँचौँ राष्ट्रिय महाधिवेशनको सन्देशसभामा मन्तव्य राख्दै उहाँले सो विचार व्यक्त गर्नुभएको हो ।
‘जेनजीले भ्रष्टाचार विरोधी जुन माग राखेका थिए, त्यो मागको पक्षमा राष्ट्रिय जनमोर्चाले पहिलेदेखि नै आन्दोलन गर्दै आइरहेको थियो’ उहाँले भन्नुभयो ।
नेता शर्माले अगाडि भन्नुभयो– ‘नेपालमा भ्रष्टाचारको विरुद्धमा लड्ने पार्टी राष्ट्रिय जनमोर्चा मात्रै हो र त्यसको नेता चित्रबहादुर केसी हुनुहुन्छ ।’
उहाँले राजमोसँग मिल्दो मुद्दा भएकाले जेनजी आन्दोलनलाई आफूहरू समर्थन गरेको स्पष्ट पार्नुभयो ।
भ्रष्टाचार विरुद्धको जेनजी आन्दोलनमा दमन भएकोमा त्यसको उहाँले विरोध गर्नुभयो ।
‘जेनजी आन्दोलनको सन्दर्भमा दुईओटा कुरा गलत भएको छ’ उहाँले भन्नुभयो– ‘एकातिर भदौ २३ गते भ्रष्टाचार विरुद्ध आन्दोलनमा उत्रिने युवाविद्यार्थीमाथि दमन भएको छ; अर्को भदौ २४ गते जेनजी आन्दोलनको नाममा राष्ट्रिय धरोहर ध्वस्त पार्ने काम भएको छ ।’
उहाँले भदौ २३ गते युवाविद्यार्थीमाथि गोली चलाउने सरकार र भदौ २४ गते जेनजी आन्दोलनको नाममा तोडफोड, आगजनीजस्ता विध्वंस मच्याउने असामाजिक तत्त्व दुवैमाथि निष्पक्ष छानबिन गरी कारबाही गर्न माग गर्नुभयो ।
फागुन २१ गते घोषणा गरिएको आमचुनावको सन्दर्भमा उहाँले अझै पनि राजनीतिक परिदृष्य स्पष्ट नभएको जिकिर गर्नुभयो ।
तात्कालिक राजनीतिक परिस्थितिबारे राजमोको धारणा व्यक्त गर्दै उहाँले भन्नुभयो– ‘यदि चुनाव हुन्छ भने राजमोले त्यसलाई स्वागत गर्नेछ । यदि संसद् पुन:स्थापना हुन्छ भने पनि राजमोले त्यसलाई स्वागत गर्नेछ किनकि दुवै अवस्थामा संविधानको रक्षा हुनेछ ।’
गत कालमा जस्तो नभएर अहिले भ्रष्टाचार विरुद्धको जेनजी आन्दोलनसित जोडिएर आएकाले संसद् पुन:स्थापनाका लागि राजमोले आन्दोलन नगर्ने उहाँले स्पष्ट पार्नुभयो ।
नेता शर्माले देशभित्रका प्रतिगामी र साम्राज्यवादीले जनआन्दोलनका उपलब्धि समाप्त गर्न खोजेकाले त्यसको विरुद्धमा लड्न आमजनतासित अपिल गर्नुभयो ।
कार्यक्रममा जनजाति सम्मेलनका अध्यक्ष निमबहादुर बुढाथोकी र जातीय समता समाजका पूर्व महासचिव भक्त विकले पनि मन्तव्य राख्नुभएको थियो ।
सभाको अध्यक्षता जनजाति सम्मेलन काठमाडौँका अध्यक्ष यम मगरले र सञ्चालन काठमाडौँ प्रदेश समितिका अर्जुन थापाले गर्नुभएको थियो ।
