काठमाडौँ । अखिल नेपाल जनजाति सम्मेलनका अध्यक्ष निमबहादुर बुढाथोकीले जातिवादका विरुद्ध आफ्नो सङ्गठन उभिएको दाबी गर्नुभएको छ ।
२०८२ कात्तिक २८ गते शुक्रबार जनजाति सम्मेलन काठमाडौँले चाबहिलचोकमा आयोजना गरेको पाँचौँ राष्ट्रिय महाधिवेशनको सन्देशसभामा मन्तव्य राख्दै उहाँले सो अभिव्यक्ति दिनुभएको हो ।
देशलाई जातजातिको आधारमा बाँड्न साम्राज्यवादीले सङ्घीयता भित्राए’ उहाँले भन्नुभयो– ‘यस खालको जातिवादको विरुद्ध हाम्रो सङ्गठन उभिएको छ । हामी त्यसको विरुद्ध आन्दोलनमा छौँ ।’
जनजाति आन्दोलनसमेतका कारण देशमा गणतन्त्र, धर्मनिरपेक्षता, समावेशिता र विकेन्द्रीयता स्थापना भएकोमा उहाँले त्यसलाई स्वागत गर्नुभयो ।
‘हामीले आदिवासी जनजाति आन्दोलनसमेतका कारण स्थापना भएको २०६२–६३ सालको जनआन्दोलनका उपलब्धिलाई स्वागत गरेका छौँ’ उहाँले भन्नुभयो– ‘तर यत्ति उपलब्धिले मात्र आदिवासी जनजातिको मुक्ति हुने छैन ।’
उहाँले जनजाति आन्दोलनको मुक्तिउत्थानका लागि स्थानीय स्वायत्त शासन प्राथमिक आवश्यकता भएको दाबी गर्नुभयो ।
पछिल्लो समयमा जेनजी आन्दोलनका कारण जनआन्दोलनका उपलब्धि खतरामा परेको बताउँदै उहाँले अहिले देश विषम परिस्थितिमा पुगेको बताउनुभयो ।
सम्बोधनको क्रममा उहाँले जेनजी आन्दोलनको नाममा देशलाई ध्वस्त बनाउने षड्यन्त्रको विरुद्ध एकजुट हुन आह्वान पनि गर्नुभयो ।
कार्यक्रममा राष्ट्रिय जनमोर्चाका केन्द्रीय सल्लाहकार आनन्द शर्मा र जातीय समता समाजका पूर्व महासचिव भक्त विकले पनि मन्तव्य राख्नुभएको थियो ।
सभाको अध्यक्षता जनजाति सम्मेलन काठमाडौँका अध्यक्ष यम मगरले र सञ्चालन काठमाडौँ प्रदेश समितिका अर्जुन थापाले गर्नुभएको थियो ।
