काठमाडौँ । नेकपा (मसाल) का प्रवक्ता रामप्रकाश पुरीले यदि नेपालमा आत्मगत परिस्थिति बलियो भएको भए क्रान्तिकारी कम्युनिस्ट शक्तिले जेनजीलाई उपयोग गर्न सक्ने बताउनुभएको छ ।
अन्तर्राष्ट्रिय नेपाली एकता समाजद्वारा २०८२ कात्तिक २१ गते शुक्रबार साँझ आयोजित भर्चुअल प्रशिक्षण कार्यक्रममा मन्तव्य राख्दै उहाँले सो अभिव्यक्ति दिनुभएको हो ।
कार्यक्रममा प्रशिक्षण दिँदै उहाँले भन्नुभयो– ‘यदि नेपालका क्रान्तिकारी कम्युनिस्ट पार्टीको आत्मगत स्थिति बलियो भएको भए जेनजी आन्दोलनलाई हामीले पनि प्रयोग गर्न सक्दथ्यौँ ।’
जेनजी आन्दोलन स्पष्ट विचारको आधारमा सञ्चालित नभएको स्पष्ट पार्दै उहाँले त्यसका सकारात्मक पक्षसमेत रहेको पनि उहाँको प्रष्टोक्ति थियो ।
‘जेनजी आन्दोलनका सकारात्मक पक्ष पनि छन्’ उहाँले भन्नुभयो– ‘जनताले विद्रोह गर्न सक्दैनन् भन्ने भ्रम जेनजी आन्दोलनले तोडिदियो ।’
उहाँले भ्रष्टाचारको विरुद्धमा जेनजीले उठाएको आवाज नेपाली जनताको पनि माग रहेको उहाँले बताउनुभयो ।
जेनजी आन्दोलन असङ्गठित भएको बताउँदै प्रवक्ता पुरीले त्यसलाई साम्राज्यवादी शक्तिले उपयोग गरेको प्रमाणको रूपमा दलाई लामाको सुशीला कार्की सरकारलाई दिइएको बधाईको प्रसङ्ग उठाउनुभयो ।
देशमा एकातिर पुनरुत्थानवादीले गणतन्त्र र धर्मनिरपेक्षता उल्ट्याउन प्रयास गरिरहेको स्पष्ट पार्दै उहाँले जेनजी आन्दोलनलाई अमेरिकी साम्राज्यवाद उपयोग गरेको बताउनुभयो ।
कार्यक्रममा वामपन्थी नेता आनन्द शर्माले पनि प्रशिक्षण दिनुभएको थियो ।
समाजका अध्यक्ष शक्तमान बुढाथोकीको अध्यक्षता तथा सचिव तेजेन्द्र क्षेत्रीको सञ्चालनमा अघि बढेको उक्त कार्यक्रममा कार्यालय सचिव प्रकाश थापामगरले पनि सङ्क्षिप्त मन्तव्य राख्नुभएको थियो ।
कार्यक्रममा धनराज शर्मा, नवीन बस्याललगायतले पूरक जिज्ञासा राख्नुभएको थियो ।
