बुटवल । नेकपा (मसाल) का महामन्त्री मोहनविक्रम सिंहले पुँजीवादी व्यवस्थामा वामपन्थीसँग मात्र नभई प्रजातान्त्रिक शक्तिबिच पनि कार्यगत एकता हुन सक्ने बताउनुभएको छ ।
२०८२ कात्तिक १४ गते शुक्रबार प्रगतिशील पत्रकार सङ्घको आयोजनामा सम्पन्न पत्रकार सम्मेलनमा जिज्ञासालाई प्रष्ट्याउँदै उहाँले सो धारणा राख्नुभएको हो ।
नेपालमा वामएकताको सम्भावनाबारे राखेको प्रश्नको जवाफ दिँदै पुँजिवादी व्यवस्थामा वामपन्थी तथा प्रजातान्त्रिक शक्तिबिच कार्यगत एकता हुन सक्छ ।
महामन्त्री सिंहले भन्नुभयो– ‘वर्तमानको जमाना पुँजीवादी प्रजातान्त्रिक जमाना हो । प्रजातान्त्रिक शक्तिसँग पनि कार्यगत एकता हुन सक्छ, पार्टीएकता विचार मिल्ने शक्तिसँग मात्रै हुन्छ ।’
उहाँले थप्नुभयो– ‘हामीले २०४६ मा पञ्चायतका विरुद्धमा पञ्चायत विरोधी दलका विरुद्ध २०६२–६३ मा प्रतिगमनका विरुद्धमा र त्यसपछि पनि प्रतिगमनका विरुद्धमा विभिन्न वामपन्थी तथा प्रजातान्त्रिक शक्तिका कार्यगत एकता गरेका थियौँ ।’
महामन्त्री सिंहले प्रतिनिधिसभा विघटन र अन्तरिम सरकारको गठनलाई प्रतिगमनको सङ्ज्ञा दिनुभयो ।
सिंहले जेनजीको आन्दोलनपछि प्रतिनिधिसभा विघटन, आन्तरिक सरकार गठन र देशव्यापी रूपमा भएको ध्वंसात्मक कार्यले कारण देश झनै सङ्कटमा परेको बताउनुभयो ।
उहाँले व्याप्त भ्रष्टाचार, कुशासन, ओली सरकारले सामाजिक सञ्जालमाथि अनधिकृत रूपले लगाएको प्रतिबन्धका कारण वर्तमान अवस्था सिर्जना भएको बताउनुभयो ।
जेनजीको आन्दोलनको नाममा भएको ध्वंसात्मक कार्य हुनुमा मुख्य जिम्मेवार ओली र उनको नेतृत्वमा परिचालित सरकार भए पनि त्यसका पछाडि अन्य शक्तिको पनि हात रहेको महामन्त्री सिंहको भनाइ थियो ।
कानुन बनाएर सामाजिक सञ्जाल नियमन गर्नुपर्नेमा ओली सरकारले जबरजस्ती प्रतिबन्ध लगाउने कोसिस गरेपछि देशमा जेनजी आन्दोलन सुरु भएको महामन्त्री सिंहले बताउनुभयो ।
जेनजी आन्दोलनको नाममा विभिन्न अराष्ट्रिय तत्त्वको घुसपैठ हुँदा देशले भयावह अवस्था भोग्नुपरेको महामन्त्री सिंहको धारणा थियो ।
‘जेनजी आन्दोलन र अन्तरिम सरकारका पछाडि अमेरिकी साम्राज्यवादको भूमिका रहेको बताउँदै अमेरिकाले नेपाललाई इन्डोप्यासिफिक रणनीतिमा तान्ने र चीन विरुद्ध रणनीति अघि बढाउने प्रयास गरिरहेको छ’ सिंहले भन्नुभयो– ‘नेपालमा प्रत्यक्ष निर्वाचित कार्यकारी प्रमुख (राष्ट्रपति) प्रणाली ल्याउने सोचलाई अधिनायकवादको ढोका खोल्ने सोचको रूपमा आएकाले नेपालजस्तो देशमा त्यस्तो प्रणालीले प्रजातन्त्र र राष्ट्रियता दुवैलाई खतरा पुग्नेछ ।’
उमेरलाई मात्र आधार बनाउने सोच गलत हो । नेतृत्वका लागि उमेर होइन, सोच, दृष्टिकोण र इमानदारिता नै मुख्य मापदण्ड हुनुपर्ने भनाइ उहाँको थियो ।
राजनीतिमा पुस्तान्तरणको प्रश्नमा सिंहले अगाडि भन्नुभयो– ‘देशको विकास तब मात्र सम्भव छ, जब भ्रष्टाचार नगर्ने, निष्कलङ्क छवि भएका नेता विजयी हुन्छन् । पुरानो वा नयाँ दलको होइन, इमान्दार दल र नेता देशको लागि खाँचो छ, जो राष्ट्रिय जनमोर्चा मात्रै हो ।’
महामन्त्री सिंहले राजमो राजनीतिक रूपमा इमानदार र निष्कलङ्क पार्टी भएको बताउनुभयो । पैसा बाँडेर चुनाव जित्ने सत्तामा पुगेर राजनीतिलाई उद्योगको रूपमा प्रयोग गर्ने प्रचलनको अन्त्य नहुँदासम्म देशको विकासले गति लिन नसक्ने सिंहको भनाइ थियो ।
‘संविधान खारेज गर्दा देश झन सङ्कटमा फस्ने भएकाले संविधान संशोधन गरेर सङ्घीयता खारेज गर्नुपर्दछ’ अहिले संविधान खारेज गर्नुपर्छ भन्ने चर्चा चलिरहेकोबारे चर्चा गर्दै सिंहले भन्नुभयो– ‘संविधानले गणतन्त्र, धर्मनिरपेक्षता, मौलिक अधिकार र बहुदलीय व्यवस्था दिएकाले यो संविधान खारेज गर्नहुँदैन ।’
