काठमाडौँ । नेकपा (माओवादी केन्द्र) का अध्यक्ष पुष्पकमल दाहाल पिपलपाते बोलीका लागि चिनिन्छन् । तत्कालको शक्तिसन्तुलन हेरेर सोर्याक् पारेर बोल्नु उनको विशेषता हो । आज उनले यस्तै बोली बोलेका छन् महोत्तरीमा ।
जेनजीको आक्रोश सबैभन्दा बढी पार्टीका पुराना नेता विरुद्ध थियो, खासगरी सत्ताधारी दलका नेतृत्वकर्ता विरुद्ध । त्यस लिस्टमा ओली र देउवासँगै प्रचण्ड पनि छन् । यही आक्रोशमा प्रचण्डको घर जलाइयो र उनका छोरीहरू विरुद्ध पनि आक्रोश देखा पर्यो ।
त्यसो त उनी र उनका परिवारलाई नै लक्षित गरेर ‘नो नट अगेन’ देखि ‘नोप बेबी’ जस्ता अभियान पनि चल्ने गरेका छन् ।
तिनै प्रचण्डले आगामी चुनावमा आफूअनुकूल वातावरण मिलाउन २०८२ कात्तिक ५ गते महोत्तरीको रामगोपालपुरमा आयोजित कार्यक्रमलाई सम्बोधन गर्दै जेनजी र माओवादी मिलेर चुनाव लडे मात्रै जेनजीका माग पूरा हुने बताए ।
‘अब जेनजी र माओवादी मिलेर चुनाव लड्नुपर्छ र मात्रै जेनजीका माग पूरा हुन सक्छन्’ उनले भने– ‘अरू कसैले जेनजीका माग पूरा गर्दैनन् ।’
प्रत्यक्ष निर्वाचित कार्यकारी, पूर्ण समानुपातिक निर्वाचन प्रणाली र समावेशी लोकतन्त्रको मुद्दा विगतदेखि नै माओवादीले उठाउँदै आएको चर्चा गरेका दाहालले यस विरुद्ध रहेकाले जेनजीको भावना बुझ्न नसक्ने बताए ।
‘जो प्रत्यक्ष निर्वाचित कार्यकारीको विरुद्धमा छ, जो पूर्ण समानुपातिक निर्वाचन प्रणालीका विरुद्धमा छ, जो समावेशी लोकतन्त्रको विरुद्धमा छ, उनीहरूले जेनजीको भावनालाई बुझ्न सम्भव छैन’ उनले थपे– ‘यसकारण मैले पेरिसडाँडाबाट पनि पत्रकारसँगको कुराकानीमा पनि जेनजीलाई लगातार अपिल गर्दै आएको छु ।’
यस सन्दर्भमा यो पनि उल्लेखनीय छ, जेनजीमा माओवादीबाट पनि घुसपैठ भएका थियौँ । यस सन्दर्भमा विद्यार्थी सङ्गठनको महासचिवजस्तो पदमा चुनाव लडेका नै संसद् भवन तोडफोडमा संलग्न थिए ।
त्यस्तै कार्यक्रममा प्रवेश गरेको नवप्रवेशीतर्फ इङ्गित गर्दै माओवादीमा ६० प्रतिशतजति जेनजी प्रवेश गरेको पनि बताए ।
उनले भने– ‘मैले कहिलेकाहीँ भन्छु, हिजो हामीले जनयुद्ध र जनआन्दोलन गर्दा जेनजी नै थियौँ, आज मधेसमा सयौँको सङ्ख्यामा पहिलोचोटी जेनजी आन्दोलनपछिको अति भव्य सार्वजनिक कार्यक्रममा सयौँ, हजारौँ वरिपरि, ६० प्रतिशत जेनजी कुन पार्टीमा प्रवेश गरे ? माओवादी केन्द्रमा ।’
