धनवीर पुनमगर, भरतपुर ।
अखिल नेपाल जनजाति सम्मेलनको पाँचौँ राष्ट्रिय महाधिवेशन समापन भएको छ । २०८२ असोज २६ गते सुरु भएको आज असोज २७ गते औपचारिक कार्यक्रमाझ समापन गरिएको हो ।
नवनिर्वाचित अध्यक्ष निमबहादुर बुढाथोकीले प्रतिबद्धता मन्तव्य राखेसँगै उक्त कार्यक्रममा नेकपा (मसाल) का महामन्त्री मोहनविक्रम सिंहले नयाँ कार्यसमितिलाई बधाई तथा सफल कार्यकालको शुभकामना दिनुभएको थियो ।
सो अवसरमा मन्तव्य राख्दै महामन्त्री सिंहले प्रत्यक्ष निर्वाचित राष्ट्रपति प्रणाली नेपालको लागि उपयुक्त नभएको धारणा व्यक्त गर्नुभयो ।
जेनजी आन्दोलनमा अमेरिकी साम्राज्यवादको प्रत्यक्ष सहभागिता रहेको दाबी गर्दै उहाँले प्रत्यक्ष कार्यकारी निर्वाचित राष्ट्रपतिको मागका पछाडि अमेरिकाको हात रहेको हुन सक्ने आशङ्का व्यक्त गर्नुभयो ।
‘जेनजी आन्दोलनमा अमेरिकी साम्राज्यवादको प्रत्यक्ष सहभागिताको प्रमाण दलाई लामाले बधाई दिनु हो’ उहाँले भन्नुभयो ।
जेनजी आन्दोलनमा अमेरिकी साम्राज्यवादको प्रत्यक्ष सहभागितासँगै नेपालको राजनीतिलाई भविष्य कालो अँधेरीतर्फ धकेल्ने कोसिस भएको दाबी उहाँले गर्नुभयो ।
वामपन्थी आन्दोलनमा नेपालका आदिवासी र जनजातिको महत्त्वपूर्ण भूमिका रहेको बताउँदै उहाँले नयाँ समितिलाई बधाई तथा सफल कार्यकालको शुभकामना दिनुभएको थियो ।
सीता पुनको अध्यक्षता तथा रामबहादुर जिएमको सञ्चालनमा अघि बढेको उक्त कार्यक्रममा अखिल नेपाल किसान महासङ्घ (अप्फा) का अध्यक्ष भैरवराज रेग्मी र राष्ट्रिय जनमोर्चाका केन्द्रीय सदस्य राजेन्द्र ढुङ्गानाले पनि बधाई मन्तव्य राख्नुभएको थियो ।
