धनवीर पुनमगर, भरतपुर ।
नेकपा (मसाल) का महामन्त्री मोहनविक्रम सिंहले गत भदौ २३ र २४ गते जेनजी पुस्ताले भ्रष्टाचार र कुशासनको विरुद्ध आन्दोलन गरे पनि त्यसलाई साम्राज्यवादी शक्तिले उपयोग गरेको धारणा व्यक्त गर्नुभएको छ ।
२०८२ असोज २७ गते सोमबार राष्ट्रिय जनमोर्चा चितवनले होटल गङ्गोत्रीमा आयोजना गरेको पत्रकार सम्मेलनमा बोल्दै उहाँले यस्तो अभिव्यक्ति दिनुभएको हो ।
‘सत्ताधारी दलको कुशासनको विरुद्ध, भ्रष्टाचारको विरुद्ध आन्दोलन आवश्यक थियो’ उहाँले भन्नुभयो– ‘तर जेनजी पुस्ताको आन्दोलनलाई साम्राज्यवादी शक्तिले उपयोग गरे । मुख्यत: अमेरिकी साम्राज्यवाद र भारतीय साम्राज्यवादले उपयोग गरे ।’
उहाँले देशभिका विभिन्न राजनीतिक शक्तिले पनि जेनजी आन्दोलनलाई उपयोग गरेको बताउनुभयो ।
त्यस क्रममा उहाँले प्रतिक्रियावादी वा राजावादी राप्रपा, रास्वपाजस्ता शक्तिले पनि जेनजी आन्दोलनलाई दुरुपयोग गरेको धारणा व्यक्त गर्नुभयो ।
महामन्त्री सिंहले अहिलेको जेनजी प्रकरणबाट जुनसुकै आन्दोलन सही नीति तथा कार्यक्रमको आधारमा सञ्चालन हुनुपर्ने अन्यथा त्यसले सही दिशा दिन नसक्ने प्रस्ट भएको बताउनुभयो ।
‘जेनजी आन्दोलनले पुष्टि गरेको छ, कुनै पनि आन्दोलन सही नीति, नेतृत्व र कार्यक्रमको आधारमा सञ्चालन गरिनुपर्दछ अन्यथा त्यसको परिणाम सही आउँदैन’ उहाँले भन्नुभयो ।
सही नीति, सङ्गठन, अनुशासन र कार्यक्रमको अभावमा नै जेनजी आन्दोलनको क्रममा ठुलो मात्रामा तोडफोड तथा विध्वंसात्मक गतिविधि भएको तर त्यसबाट ठोस उपलब्धि प्राप्त हुन नसकेको उहाँको भनाइ थियो ।
जेनजी आन्दोलन सङ्गठित र योजनाबद्ध नभएकाले नै अहिलेसम्म देशको राजनीतिले प्रष्ट दिशा लिन नसकेको उहाँको विश्लेषण थियो ।
‘जेनजी आन्दोलन स्पष्ट राजनीतिक दिशा लिएर सञ्चालन भएको थिएन’ उहाँले भन्नुभयो– ‘त्यसैले अहिले जेनजीका नाममा जुन बेग्लाबेग्लै विचार अगाडि आएका छन्, तीमध्ये कुन जेनजीका विचार हुन् भनेर छुट्याउन गाह्रो छ ।’
अहिले कतिपयले संविधान खारेज गरेर अन्तरिम संविधान बनाउने वा प्रत्यक्ष निर्वाचित राष्ट्रपति निश्चित भएपछि मात्रै चुनावमा जाने विचार व्यक्त गरेकोमा उहाँले त्यसको विरोध गर्नुभयो ।
‘जहाँसम्म प्र्रत्यक्ष निर्वाचित कार्यकारी राष्ट्रपतिको कुरा छ, हामीले त संसदीय व्यवस्थालाई नै रणनीतिक रूपमा गलत मान्दछौँ र त्यसको विकल्पमा नयाँ जनवादी व्यवस्था चाहन्छौँ’ उहाँले भन्नुभयो ।
उहाँले नेपालको सन्दर्भमा राष्ट्रपतीय प्रणाली गलत भएको भनाइ राख्नुभयो ।
‘राष्ट्रपतीय प्रणाली कस्तो हुन्छ, त्यो अमेरिकामा ट्रम्पको शासनले देखाइसकेको छ’ उहाँले भन्नुभयो ।
साम्राज्यवादी तथा पुनरुत्थानवादीहरू नेपालमा जनआन्दोलनको बलमा प्राप्त भएको गणतन्त्र र धर्मनिरपेक्षताको विरुद्धमा भएको स्पष्ट पार्दै उहाँले त्यसैको परिणामस्वरूप अहिले संविधान खारेज, संसद् विघटन र संसद् बाहिरबाट प्रधानमन्त्रीको चयन भएको बताउनुभयो ।
राजमो चितवनका अध्यक्ष अमरबहादुर क्षेत्रीको सहजीकरणमा अगाडि बढेको सो कार्यक्रममा राजमो नेता डम्मर पुरी, वासुदेव पोखरेल, अखिल नेपाल महासङ्घ (अप्फा) का अध्यक्ष भैरवराज रेग्मीलगायतको उपस्थिति रहेको थियो ।
