बुटवल । राष्ट्रिय जनमोर्चाका अध्यक्ष चित्रबहादुर केसीले सत्तारूढ दललाई तपाईंहरू नसुध्रिए यो अवस्था आउने चेतावनी पहिले नै दिएको बताउनुभएको छ ।
२०८२ असोज २३ गते बिहीबार अखिल नेपाल जनजाति सम्मेलनको तेस्रो रुपन्देही जिल्ला सम्मेलनलाई सम्बोधन गर्दै उहाँले यस्तो अभिव्यक्ति दिनुभएको हो ।
‘मैले लगातार भन्दै आएको छु, यदि तिमीहरू सुध्रिएनौ भने यस्तो अवस्थामा आउनेछ’ सम्मेलनको उद्घाटनपछि मन्तव्य राख्दै प्रमुख अतिथि केसीले भन्नुभयो– ‘नभन्दै भदौ २३–२४ गतेको जेनजी आन्दोलनले त्यो अवस्था आइछाड्यो ।’
उहाँले युवा समुदायलाई देशमा केही हुँदैन भन्ने भाष्य देशभित्रका शासक र विदेशी प्रतिक्रियावादी खडा गरिएको बताउनुभयो ।
‘देशको अवस्था गम्भीर छ । नेपाली समाजमा केही हुँदैन भन्ने भाष्य खडा गरिएको छ’ उहाँले भन्नुभयो– ‘कुनै देशलाई सिध्याउन छ भन्ने त्यस देशको शिक्षाप्रणाली ध्वस्त पार्नुपर्छ । आखिर नेपालको शिक्षाप्रणाली ध्वस्त नै पारिएको छ ।’
देशका भ्रष्ट र नालायक सरकारको भूमिकाले गर्दा युवा समुदाय त्यसबाट प्रभावित भएको उहाँको भनाइ थियो ।
‘जेनजी आन्दोलन त बहाना बन्यो । देशमा यो स्थिति ल्याउन दृश्यअदृश्य शक्तिकेन्द्रको हात छ’ उहाँले आन्दोलनमा विदेशी अराष्ट्रिय तत्त्वको घुसपैठबारे भन्नुभयो– ‘जेनजी आन्दोलनकै क्रममा २०७२ सालको संविधान जलाउने प्रयत्न गर्नु त्यसको एउटा प्रमाण हो ।’
कार्यक्रममा जातीय समता समाजका अध्यक्ष तथा राष्ट्रियसभाका सांसद राजेश विश्वकर्माको विशिष्ट आतिथ्य रहेको थियो ।
सम्मेलनलाई तराई मधेस जनवादी मोर्चाका अध्यक्ष बद्रे आलम, कम्युनिस्ट सङ्ग्रहालयका अध्यक्ष चेतनाथ आचार्य, अखिल नेपाल किसान महासङ्घ (अप्फा) का केन्द्रीय सदस्य रुकबहादुर पराजुली, रक्तिम सांस्कृतिक अभियानकी केन्द्रीय सदस्य मीना बुढाथोकी, अखिल नेपाल राष्ट्रिय उद्योग व्यापार सङ्घका उपाध्यक्ष पदम श्रेष्ठ, अखिल नेपाल बुद्धिजीवी सङ्घ रुपन्देहीका अध्यक्ष लीलबहादुर केसी, राजमो रुपन्देहीका जिल्ला अध्यक्ष टानबहादुर केसी, उद्योग व्यापार सङ्घका पूर्व अध्यक्ष ढुण्डिराज शर्मा र अप्फा रुपन्देहीका जिल्ला अध्यक्ष गणेश गौतमले शुभकामना दिनुभएको थियो ।
नारायण पुनको अध्यक्षता तथा नगेन्द्र श्रीनेतको सञ्चालनमा अघि बढेको सो कार्यक्रममा उपस्थित जनसमुदायलाई विष्णु श्रीनेतले स्वागत गर्नुभएको थियो ।
अध्यक्षमा पुन
सम्मेलनले नारायण पुन अध्यक्ष रहनुभएको ११ पू्र्ण, तीन वैकल्पिक र तीन सल्लाहकारसहित जनजाति सम्मेलनको जिल्ला समिति चयन गरेको छ ।
समितिको उपाध्यक्ष- विष्णु श्रीनेत, सचिव- नगेन्द्र श्रीनेत, सहसचिव– दिपक थापा र कोषाध्यक्ष- अमृता पुन तथा सदस्यमा बागवीर पुन, भीमबहादुर थापा, मिरा पुन, थमनसिंह पुलामी, केसर राना र हरि राहाडी रहनुभएको छ ।
त्यस्तै वैकल्पिक सदस्यमा नरबहादुर थापा, तुलबहादुर गाहा तथा सल्लाहकार थामबहादुर पुन, खगेन्द्र श्रीस र पूर्णबहादुर घर्तीमगर चयन हुनुभएको छ ।
