दाङ । राष्ट्रिय जनमोर्चा घोराही नगर समितिको आयोजनामा एकदिने प्रशिक्षण कार्यक्रम सम्पन्न भएको छ ।
राजमो केन्द्रीय सदस्य तथा दाङ जिल्ला समितिका अध्यक्ष गणेश आचार्यको प्रमुख आतिथ्यमा २०८२ असोज १० गते शुक्रबार सो कार्यक्रम सम्पन्न भएको हो ।
‘वर्तमान राजनीतिक सङ्कट र यसका समाधान” विषयक सो कार्यक्रममा प्रशिक्षण दिँदै आचार्यले जेनजी आन्दोलनको कारणले देशमा जटिल परिस्थिति उत्पन्न भएको बताउनुभयो ।
संसद्मा दुईतिहाइ बहुमतको काङ्ग्रेस–एमाले सरकारको शासनकालमा भ्रष्टाचार, अनियमितता, महँगीजस्ता जनविरोधी क्रियाकलापले गर्दा देशमा सङ्कटपूर्ण स्थिति पैदा भएको विचार व्यक्त गर्नुभयो ।
अर्का वक्ता अखिल नेपाल युवक सङ्घका पूर्वकेन्द्रीय अध्यक्ष काशीनाथ पोखरेलले पनि यस्तो अवस्थामा नेपाल कम्युनिस्ट पार्टी (मसाल) र राष्ट्रिय जनमोर्चाले मात्रै सुझबुझपूर्ण तरिकाले यसको समाधानका उपाय दिन सक्ने दाबी गर्नुभयो ।
सत्तासिन काङ्ग्रेस, एमाले र माओवादी केन्द्रका क्रियाकलापले देश अँध्यारो सुरुङभित्र प्रवेश गरेको बताउँदै उहाँले त्यो सुरुङबाट देश कसरी बाहिर निस्कन्छ भन्ने कुरा आज सबैको चासोको विषय बनेको बताउनुभयो ।
कार्यक्रममा अखिल नेपाल जनजाति सम्मेलनका पूर्व केन्द्रीय सदस्य रामबहादुर जिएम, अखिल नेपाल कानुन व्यवसायी सङ्घका केन्द्रीय उपाध्यक्ष नुमानन्द आचार्य, अखिल (छैठौँ) का केन्द्रीय सदस्य तथा दाङका अध्यक्ष सेवक भट्टराई र युवक सङ्घ लुम्बिनी प्रदेश समितिका सदस्य दीपक केसीले पनि समसामयिक विषयमा विचार राख्नुभएको थियो ।
सो अवसरमा अखिल नेपाल शिक्षक सङ्घ दाङका सहसचिव उमकला खनाल, राजमो दाङकी सदस्य कृष्ण राना मेघराज भट्टराई, अखिल नेपाल प्रगतिशील लेखक सङ्घ (अन्पा) का लुम्बिनी प्रदेश उपाध्यक्ष सुरेशकुमार पाण्डे, राजमो ज्येष्ठ सदस्य बुद्धिराम खड्का, जातीय सम्पदा समाज दाङका अध्यक्ष सूर्यलाल नेपालीको आतिथ्य रहेको थियो ।
राजमो घोराही नगर समितिका अध्यक्ष मनिराम खनालको अध्यक्षतामा सुरु भएको सो कार्यक्रममा उपस्थित सहभागीलाई नगर उपाध्यक्ष चन्द्रबहादुर राउतले मन्तव्यद्वारा स्वागत गर्नुभएको थियो ।
कार्यक्रमको सहजीकरण नगर समितिका सचिव बलदेव विकले गर्नुभएको थियो ।
