काठमाडौँ । भ्रष्टाचार, अनियमित्ता विरुद्ध उठनेको जेनजी आन्दोलनको वलमा स्थापित शुशिला कार्की सरकारमा आर्थिक अनियमित्ताको आरोप खेपीरहेकी संगीता कौशल मिश्रा स्वास्थ्य तथा जनसंख्या मन्त्री बन्ने चर्चाले यतिवेला राजनीतिक वृत्तमा निकै बजार पाएको छ ।
स्वास्थ्य मन्त्रालयकी अतिरिक्त सचिव रहेकी मिश्रा स्वास्थ्य सेवा विभागको प्रमुख रहँदा निश्चित स्वास्थ्य उपकरण आपूर्तिकर्ताको स्वार्थमा काम गरेको आरोपमा मुछिएकी थिइन् ।
विशेष अदालतमा भ्रष्टाचारको मुद्दा खेपिरहेका मोहन बस्नेत स्वास्थ्यमन्त्री रहेको बेला उनले मिश्रासहित आफ्नो विश्वासिलो समूहलाई विभागमा लगेर खरिदमा अनियमितता गरेको बताइएको थियो । मिश्रा विभाग प्रमुख हुँदा भएका अधिकांश स्वास्थ्य सामग्री तथा उपकरणको खरिद निश्चित व्यापारिक समूहको स्वार्थमा भएको विषयले पनि उतिवेला सञ्चार जगतमा बजार पाएकै हो । बस्नेत मन्त्रीबाट हटेपछि छोटो समयका लागि स्वास्थ्यमन्त्री बनेका उपेन्द्र यादव र प्रदीप यादवको पालामा समेत मिश्रा विभागमै टिकेकी थिइन् ।
प्रदीप पौडेल स्वास्थ्यमन्त्री भएपछि मिश्राको सरुवा भएको थियो । पौडेलले मिश्राको सरुवा गरेर विकास देवकोटालाई विभागको प्रमुख बनाए पनि देवकोटाले समेत मिलेमतोमै खरिद प्रक्रिया अगाडि बढाएको आरोप अहिले पनि छ । पछि उनी बढुवा भएर मन्त्रालयको सचिव बनेका थिए ।
(हामीले संगीता कौशल मिश्रामाथि लागेका आरोपहरू विषयहरू उकेराबाट लिएका हौँ ।)
बस्नेतको पालामा विभागले अनियमित रूपमा गरेको खरिद निर्णयमा प्रत्यक्ष जोडिएकी मिश्रालाई स्वास्थ्यमन्त्री बनाउन ॅजेन–जी’ पुस्ताको भ्रष्टाचारविरोधी आन्दोलनको बलमा बनेको भनिएको सरकारले आइतबार सिफारिस गरेको थियो ।
मन्त्री नियुक्त हुने निश्चित भएपछि मिश्राले आइतबारै मन्त्रालयको अतिरिक्त सचिव पदबाट राजीनामा दिएर मन्त्रीको सपथग्रहणका लागि तयार भएकी छिन् । उनीसहित पाँच जनालाई मन्त्रीमा नियुक्त गर्न आइतबार साँझ नै राष्ट्रपति कार्यालयमा नाम पठाइएको थियो ।
तर समाचार जगतमा आएको चर्चा र मिश्राको पछिल्लो गतिविधिलाई अध्ययनपछि उनलाई प्रधानमन्त्रीको सचिवालयबाट राष्ट्रपति कार्यालयमा तत्काल नियुक्ति प्रक्रिया अघि नबढाउन अनुरोध गर्दै फोन गएको थियो ।
