काठमाडौँ । सिके रावत नेतृत्व रहेको जनमत पार्टी फुटेको छ । सो पार्टीका उपाध्यक्ष दीपकुमार साह र कोषाध्यक्ष सुरेन्द्र नारायण यादवले जनमत पार्टीबाट अलगिएर जनस्वराज पार्टी घोषणा गरेका छन् ।
न्यायपूर्ण, समृद्ध र आत्मनिर्भर राष्ट्र निर्माणको उद्देश्यसहित दीपकुमार साहको संयोजकत्वमा जनस्वराज पार्टी घाषणा गरिएको छ । यही असोज ३ र ४ गते जनकपुरमा आयोजित प्रशिक्षण कार्यक्रमबाट जनस्वराज पार्टीको घोषणा गरिएको संयोजक साहले जानकारी दिए ।
भेलाले साहको संयोजकत्वमा प्रशिक्षण विभाग र सुरेन्द्रनारायण यादवको संयोजकत्वमा आर्थिक विभागसमेत गठन गरेको बताएको छ ।
उक्त पार्टीले कार्यकारी राष्ट्रपतीय प्रणाली र पूर्णसमानुपातिक निर्वाचन प्रणाली लागू गर्न, बेथिति र भ्रष्टाचारमुक्त, पारदर्शी र जवाफदेही राजनीति स्थापित गर्न, शिक्षा, स्वास्थ्य र रोजगारीको सुनिश्चिततासहित मुलुक सुहाउँदो पूर्वाधार विकासलाई प्राथमिकता दिनेलगायत उद्देश्य लिएको संयोजक साहले बताए ।
