बागलुङ । राष्ट्रिय जनमोर्चा बागलुङले काठेखोला गाउँपालिका–४ तंग्राममा गएको पहिरोमा परि पीडित भएका परिवारलाई राहत वितरण गरेको छ ।

राजमोले सोमबार मृतक बिमला पुनको परिवारलाई रु १० हजार र पहिरोबाट बिस्तापित भएका चन्द्र बहादुर पुन, भिम बहादुर पुन र लाल बहादुर पुनका परिवारलाई रु ४ हजारका दरले राहत रकम उपलब्ध गराएको हो ।

राहत वितरणका क्रममा राष्ट्रिय जनमोर्चाका राष्ट्रिय परिषद् सदस्य तिलक थापा, राजमो तंग्रामका अध्यक्ष बिष्णु कँडेल, तंग्रामका सदस्य थमन पुन, स्थानीय समाजसेवी श्याम पुन, याम बहादुर पुन लगायतको उपस्थिति रहेको थियो ।

सो गाउँपाकिलाको फापरखेतमा असार ६ गते गएको पहिरोमा परी एक जनाको मृत्यु भएको थियो भने केही परिवार बिस्थापित भएका थिए ।