प्युठान । जेनजी आन्दोलनका सन्दर्भमा आगजनी हुँदा कैयौँ फाइल पनि खरानी भएकोले जेल सजाय भोगीरहेका कुख्यात अपराधीहरू जोगिने बाटो खुलेको राष्ट्रिय जनमोर्चाका नेता बोम बहादुर खत्रीले बताउनु भएको छ ।
‘अहिलेको आन्दोलनबाट राष्ट्रका भौतिक सम्पत्तिहरूमा निकै ठूलो क्षति पुग्नुको साथै ऐतिहासिक दस्तावेजहरू समेत नष्ट भएका छन्’ खत्रीले भन्नु भयो– ‘ठूलाठूला काण्ड र भ्रष्टाचारका फाइलहरू पनि नष्ट हुँदा कुख्यात अपराधीहरू जोगिने बाटो खुलेको छ ।’
भ्रष्टाचारको मुद्धा खेपिरहेका र विभिन्न मुद्धामा जेल पुगेकाहरू जेलबाट भागेको अवस्थामा देशको अवस्था निकै भयावह र गम्भीर रहेको नेता खत्रीको थप भनाई थियो ।
नेता खत्रीले असौज १ गते राष्ट्रिय जनमोर्चा प्युठान जिल्ला समितिले पालिका स्तरीय प्रशिक्षण कार्यक्रम अभियानको उद्घाटन सभालाई सम्बोधनका क्रममा सो अभिव्यक्ति दिनुभएको हो ।
मल्लरी गाउँपालिकाको खलङ्गामा आज उक्त कार्यक्रम सम्पन्न भएको छ । कार्यक्रममा राष्ट्रिय जनमोर्चा लुम्बिनी प्रदेशका अध्यक्ष बोमबहादुर खत्रीले प्रमुख अतिथिको आसनबाट अहिले देश ऐतिहासिक संकटमा परेको बताउनु भयो । वर्तमान राजनीतिक परिप्रेक्षमा संविधान नै नरहने अवस्थामा पुगेको हुँदा सम्पूर्ण लोकतन्त्र तथा देशभक्त शक्तिहरू सजग रहनुपर्ने बेला आएको नेता खत्रीले बताउनुभयो ।
कार्यक्रममा नेकपा (मसाल) लुम्बिनी प्रदेशका प्रवक्ता तिलक जिसीले राष्ट्रिय तथा अन्तर्राष्ट्रिय परिस्थितिलाई नेकपा (मसाल)ले जहिले पनि विश्लेषण गरी भविष्यलाई सधैँ आकलन गरिरहेको कुरा बताउनुभयो ।
हिजो वा आज जतिबेला पनि त्यसको अवस्थालाई सही ढंगले बुझेर आफ्नो नीति र कार्यक्रम सधैँ देश र जनताप्रति लक्षित हुने जिसीको भनाई थियो ।
कार्यक्रममा अखिल नेपाल युवक संघका केन्द्र्रीय कोषाध्यक्ष कमल पौडेल, जनजाति सम्मेलनका महासचिव अम्मर धोज राना, किसान संघका जिल्ला अध्यक्ष गिरिराज पौडेलले समसामयिक एवं राजनीतिक विषयमा परीक्षण दिनुभएको थियो।
कार्यक्रममा मल्लनी गाउँपालिकाका १ देखि ५ सम्मका सम्पूर्ण वडाका नेता कार्यकर्ताहरूको उपस्थिति रहेको थियो ।
कार्यक्रम राष्ट्रिय जनमोर्चा मल्लनी गाउँ कमिटीका अध्यक्ष गुणेन्द्र बस्नेतको अध्यक्षता, उपाध्यक्ष डोरप्रसाद पोखरेलको स्वागत मन्तव्य र सचिव दुर्गा थापाको सञ्चालनमा सम्पन्न भएको थियो ।
उक्त कार्यक्रम राष्ट्रिय जनमोर्चा जिल्ला समिति प्युठानले सबै पालिकाहरूमा गर्ने निर्णय गरेको छ । त्यस अनुसार मण्डबिमा असौज ३ गते, स्वर्गद्वारीमा असौज ४ गते, प्युठान नगरपालिकामा असौज ५ गते, झिम्रुकमा असौज ६ गते, गौमुखीमा असौज ७ गते प्रशिक्षण कार्यक्रम सम्पन्न गर्ने ठेगान गरेको छ ।
