काठमाडौँ । सरकारले यही भदौ २३ र २४ गते भएको जेनजी आन्दोलनको क्रममा निधन भएकाको शोकमा असोज १ गते शोकदिव घोषणा गर्दै सहिदलाई १५ लाख सहयोग गर्ने निर्णय गरेको छ ।
नवगठित मन्त्रिपरिषद्को २०८२ भदौ ३० गते सोमबार बसेको पहिलो बैठकले सहादत प्राप्त गर्नेलाई राष्ट्रिय सम्मानसहित राष्ट्रिय झण्डा ओढाउने र अन्त्येष्टि गर्ने निर्णय गरेको गृहमन्त्री ओमप्रकाश अर्यालले जानकारी दिनुभयो ।
यसैगरी आन्दोलनका क्रममा सहादत प्राप्त गर्ने व्यक्तिको सम्मानमा आगामी असोज १ गते शोक दिवस मनाउने र सार्वजनिक बिदा दिने निर्णय भएको छ ।
सरकारले सहिद परिवारलाई क्षतिपूर्तिबापत नियमित दिँदै आएको १० लाख र अन्य खर्चबापत थप रु पाँच लाख थप गरी रु १५ लाख रुपियाँ सहयोग गर्ने निर्णय गरेको उहाँले बताउनुभयो । उक्त रकम अर्थमन्त्रालयले गृहमन्त्रालयलाई उपलब्ध गराउने र सम्बन्धित जिल्ला प्रशासन कार्यालयमार्फत सम्बन्धित परिवारलाई प्रदान गरिनेछ ।
बैठकले घाइतेको निःशुल्क उपचार, शव सम्बन्धित स्थानमा लैजानुपरेमा निःशुल्क व्यवस्था र दाहसंस्कारमा सघाउने निर्णय गरेको छ ।
बैठकले आन्दोलनका क्रममा भएको जनधनको क्षति र ज्यादतीको छानबिन गर्न पूर्वन्यायाधीशको संयोजकत्वमा उच्चस्तरीय जाँचबुझ आयोग गठन गर्ने सैद्धान्तिक निर्णय गरेको गृहमन्त्री अर्यालले जानकारी दिनुभयो । सोही आयोगको प्रतिवेदनका आधारमा आवश्यक काम गरिने उहाँको भनाइ छ ।
त्यस्तै सहिदको स्मरणमा “जेनजी जागरण स्मारक पार्क” निर्माण गर्ने निर्णय भएको छ ।
बैठकले अघिल्लो मन्त्रिपरिषद् बैठकमा पेस भएका तर निर्णय नभएका सबै प्रस्ताव सम्बन्धित मन्त्रालयमा फिर्ता पठाउने निर्णयसमेत गरेको गृहमन्त्री अर्यालले जानकारी दिनुभयो ।
