मनिराम खनाल, दाङ ।
राष्ट्रिय जनमोर्चा दाङले सदरमुकाम घोराहीमा भदौ २४ गते भएको आगजनी र तोडफोडको अनुगमन अवलोकन गरेको छ ।
केन्द्रीय सदस्य तथा दाङ जिल्ला समितिका अध्यक्ष गणेश आचार्यको नेतृत्वको प्रतिनिधिमण्डलले २०८२ भदौ २९ गते आइतबारका दिन सो अनुगमन अवलोकन गरेको हो ।
अनुगमनमा अवलोकनमा राजमो दाङका जिल्ला सदस्य मेघराज भट्टराई, राजमो घोराही नगर समितिका अध्यक्ष मनिराम खनाल र नगर सदस्य शुद्धबहादुर बाठालगायतको सहभागिता रहेका थिए ।
अवलोकनको क्रममा दाङका सरकारी कार्यालय, उपमहानगरपालिका, वडाकार्यालय, जिल्ला सरकारी वकिलको कार्यालय, जिल्ला अदालत, मालपोत कार्यालय, नापी शाखा कार्यालय, जिल्ला समन्वय समिति, माला इन होटललगायतका सरकारी कार्यालय र भवनको अवलोकन गरिएको जिल्ला अध्यक्ष आचार्यले बताउनुभयो ।
‘त्यहाँ रहेका महत्त्वपूर्ण कागजपत्र, कम्प्युटर, कुर्सीटेबल पूर्ण रूपमा जलेर नष्ट भएका छन् भने झ्यालढोका पनि जलेका साथै तोडफोड गरी क्षति पुऱ्याइएको छ’ आचार्यले भन्नुभयो ।
उहाँले प्रत्यक्ष रूपमा जनताको सरोकार राख्ने जिल्लाका कार्यालय, स्थानीय निकाय जलेर नष्ट हुँदा जनताको काम कारबाही अवरुद्ध भएको पनि बताउनुभयो ।
अध्यक्ष आचार्यले भन्नुभयो– ॅभदौ २४ गते जसरी आगजनी र लुटपाट भयो, त्यसमा राज्यको अरबौँ सम्पत्ति, जुन जनताको कर र पसिनाबाट निर्माण भएको हो, त्यो आज जलेर नष्ट हुँदा देशलाई ठुलो क्षति भएको महसुस गरियो ।’
उहाँले राज्यको यो क्षति जसले गरायो, त्यसलाई कारबाहीको दायरामा ल्याउनुपर्ने माग गरे ।
