काठमाडौ । पूर्व प्रधानन्यायाधीश सुशीला कार्कीको नेतृत्वमा अन्तरिम सरकारको गठन सुनिश्चित भएसँगै प्रक्रियाको विषयमा भदौ २७ गते शुक्रबार बिहानदेखि छलफल हुने भएको छ ।
राष्ट्रपति रामचन्द्र पौडेलले नेपाली सेनाका प्रधानसेनापति अशोक सिग्देलको समन्वयमा पूर्व प्रधानन्यायाधीश सुशीला कार्की र संविधानविद्को उपस्थितिमा २०८२ भदौ २६ गते बिहीबार रातिसम्म गरेको छलफलबाट यो अवस्था निर्माण भएको हो ।
बिहीबार रातिको छलफलमा संसद् विघटन गर्ने कि नगर्ने भन्नेमा सहमति नजुटेपछि शुक्रबार बिहान ९ बजेबाट पुनः छलफल सुरु हुन लागेको छ । यता पूर्व प्रधानन्यायाधीश सुशीला कार्कीलाई अन्तरिम सरकारको प्रधानमन्त्री वा मन्त्रिपरिषद अध्यक्ष नियुक्त गर्ने विषयमा भने सहमति जुटिसकेको बताइन्छ ।
जेनजी युवाको समूहले संसद् विघटनलाई बटमलाइन बनाएका तर विद्यमान संवैधानिक प्रावधानअनुसार प्रधानमन्त्रीमा नियुक्त हुन संसद्को सदस्य हुनैपर्ने भएकाले राष्ट्रपति पौडेलले वैकल्पिक उपायबारे विज्ञसँग राय मागेका थिए ।
छलफलमा जेनजी युवाको प्रतिनिधिको रूपमा काठमाडौँ महानगरपालिकाका मेयर बालेन साह कानुनी सल्लाहकारसमेत रहेका अधिवक्ता ओमप्रकाश अर्यालसमेत सहभागी थिए ।
राष्ट्रपति पौडेलले बिहीबार नै नेपाली काङ्ग्रेस र नेकपा )माओवादी केन्द्र) का अध्यक्ष पुष्पकमल दाहालसँग पनि शीतल निवासमै भेटेका थिए ।
दुई दिनसम्म भ्रष्टाचार विरोधी प्रदर्शन गरेका जेनजी प्रतिनिधिसँग भने नेपाली सेनाले जङ्गीअड्डामा छलफल गरेका थिए । त्यसपछि उनीहरूले बुधबार पूर्वप्रधानन्यायाधीश सुशीला कार्कीको नाम अघि सारेका थिए । कार्कीले समेत जिम्मेवारी लिन आफू सकारात्मक रहेको प्रतिक्रिया दिइसकेकी छन् । यसअघि बिहीबार राष्ट्रपति पौडेल र प्रधानसेनापति अशोकराज सिग्देलसँग समेत उनको पटकपटक वार्ता भइसकेको छ ।
