काठमाडौँ । नेकपा (मसाल) ले वर्तमान राजनीतिक समस्याको समाधान संविधानको परिधिभित्रैबाट खोज्न जोड दिएको छ ।
महामन्त्री मोहनविक्रम सिंहको हस्ताक्षरमा २०८२ भदौ २६ गते बिहीबार जारी प्रेसवक्तव्यमार्फत मसालले सो धारणा सार्वजनिक गरेको हो ।
संविधान वा विद्यमान बहुदलीय व्यवस्थाभन्दा बाहिरबाट समस्याको समाधान खोज्नु गलत हुने बताउँदै पार्टीले वक्तव्यमार्फत शान्ति, सुव्यवस्था र लोकतन्त्रलाई कायम राख्नुपर्ने आवश्यकतामा जोड दिएको छ ।
वर्तमान राजनीतिक परिस्थितिको विस्तृत र गहन प्रकारले विचार गर्नुपर्ने भएकाले त्यसका लागि केही समय लाग्ने बताउँदै सो वक्तव्यमा केही समयपछि आगामी कार्यक्रम निश्चित गर्ने बताइएको छ ।
यस्तो छ, प्रेसवक्तव्यको पूर्ण पाठ :
“अहिले देशमा जुन प्रकारको गम्भीर राजनीतिक स्थिति पैदा भएको छ, त्यसप्रति हाम्रो पार्टी नेकपा (मसाल) को गम्भीर ध्यान गएको छ । त्यसबारे अरू विस्तृत र गहन प्रकारले विचार गर्नुपर्ने र आगामी कार्यक्रम निश्चित गर्नुपर्ने आवश्यकता देखिन्छ । त्यसका लागि हामीलाई केही समय आवश्यक पर्नेछ तैपनि तत्काल हामीले केही महत्त्वपूर्ण विषयमा आफ्नो दृष्टिकोण प्रष्ट गर्न चाहन्छोैँ ।
१. हाम्रो जोड यो कुरामा छ कि अहिलेको राजनीतिक समस्याको समाधान विद्यमान संविधानको परिधिभित्र नै खोज्नुपर्दछ । संविधानअन्तर्गतको सङ्घीयतालाई हामीले विरोध गर्दछौँ र त्यसलाई खारेज गर्नुपर्ने आवश्यकतामा जोड दिन्छौँ तर संविधानमा व्यवस्था गरिएका गणतन्त्र, धर्मनिरपेक्षता, मौलिक अधिकार वा बहुदलीय व्यवस्थालाई रक्षा गर्नुपर्ने आवश्यकतामा हामीले जोड दिन्छौँ । तिनीहरूमा आँच पुऱ्याउने प्रकारको कुनै पनि गतिविधिको हामीले विरोध गर्दछौँ ।
२. देशको वर्तमान अन्यौलपूर्ण राजनीतिक स्थितिमा सुधार गर्ने नाममा संविधानबाहिर वा विद्यमान बहुदलीय व्यवस्थाको बाहिरबाट कुनै समाधान खोज्नेजस्ता कुरालाई हामीले गलत मान्दछौँ र विरोध गर्दछौँ ।
३. हामीले देशमा शान्ति, सुव्यवस्था र लोकतन्त्रलाई कायम राख्नुपर्ने आवश्यकतामा देशका सबै लोकतन्त्र पक्षधर शक्ति तथा आमजनताको ध्यान आकर्षित गर्न चाहन्छौँ ।”
