सर्लाहीको सीमा क्षेत्रमा प्रहरी र भारतीय नागरिकबीच झडप हुँदा एक जनाको मृत्यु भएको छ । झडपमा तीन भारतीय नागरिक घाइते भएका छन् ।

सर्लाहीको पर्सा गाउँपालिकास्थित सीमा क्षेत्रमा सशस्त्र प्रहरी र भारतीय नागरिकबीच झडप भएको हो । मृत्यु हुनेको परिचय खुल्न नसकेको सर्लाहीका प्रमुख जिल्ला अधिकारी मोहबाहादुर जिसीले जानकारी दिनुभएको छ ।

प्रजिअ जिसीका अनुसार घाइतेमध्ये एक जनाको अवस्था गम्भीर छ भने दुईजनाको अवस्था समान्य छ ।

पर्सा गाउँपालिका– ३, नारायणपुरमा भारतीय नागरिकहरु नेपाल प्रवेश गर्न खोजेपछि सशस्त्र प्रहरीले रोकेको थियो । शुक्रबार बिहान करिब ९ बजे घटना भएकाे हाे । नेपाल प्रवेश गर्न खोज्ने भारतीय समूहलाई रोक्न खोज्दा उनीहरुबाट आक्रमण भएपछि गोली चलाउनु परेको सशस्त्र प्रहरी स्रोतको दाबी छ ।

सुरुमा ४०/४५ जना भारतीय जवरजस्ती नेपाल प्रवेश गर्न खाजेपछि सशस्त्र प्रहरीले रोक्ने प्रयास गरेका थिए । त्यसक्रममा भएको झडपका क्रममा भारतीय नागरिकले सशस्त्र प्रहरीको एसएलआर बन्दुक पनि खोसेका थिए । हतियार खोस्ने व्यक्तिलाई पक्राउ गरिएको सशस्त्र प्रहरी स्रोतले जनाएको छ।