काठमाडौँ । राष्ट्रिय जनमोर्चाले निर्वाचन आयोगले मस्यौदा गरेको ‘राजनीतिक दल मूल्याङ्कन कार्यविधि–२०८२’ लाई अस्वीकार गरेको छ ।
महासचिव मनोज भट्टका अनुसार संविधान र राजनीतिक दलसम्बन्धी ऐनको मर्म र भावनाविपरीत भएको भन्दै राजमोले प्रस्तावित कार्यविधिलाई अस्वीकार गरेको हो ।
आयोगलाई २०८२ साउन २२ गते बिहीबार पत्र पठाउँदै राजमोले आयोगको कार्यविधि दलको आन्तरिक स्वायत्ततालाई कुण्ठित गर्ने भएको र त्यसो गर्नु आयोगको क्षेत्राधिकारभन्दा बाहिर गएको ठहर गरेको छ ।
युगदर्शनलाई प्राप्त राजमोको सो पत्रमा भनिएको छ :
“ उपर्युक्त सम्बन्धमा निर्वाचन आयोगबाट हाम्रो दलको नाममा २०८२ साउन ८ गते बिहीबार पत्र सङ्ख्या २०८२/८३ का.रा.द/१८ तत् तत् चलानी नम्बर उल्लेख भएको पत्रका साथ राजनीतिक दल मूल्याङ्कन कार्यविधि–२०८२ को मस्यौदासमेत प्राप्त भई व्यहोरा अवगत भयो ।
उक्त मस्यौदा नेपालको संविधान–२०७२, राजनीतिक दलसम्बन्धी ऐन–२०७३ को मर्म र भावना विपरीत भएकाले हाम्रो दलले निर्वाचन आयोगबाट मस्यौदा गरी प्रेसित गरिएको स्वमूल्याङ्कन कार्यविधि–२०८२ लाई अस्वीकार गर्दछ । त्यसका साथै नेपालको संविधान तथा राजनीतिक दलसम्बन्धी ऐनको भावना विपरीत दलको आन्तरिक स्वायत्ततालाई कुण्ठित गर्ने दलीय आधारमा मुलुकको शासन प्रणाली सञ्चालन हुने मान्यता विपरीत निर्वाचन आयोगले दलमाथि अङ्कुश लगाउने आफ्नो क्षेत्राधिकारभन्दा बाहिर गई तयार पारेको स्वमूल्याङ्कन कार्यविधि तर्जुमा गर्ने कारबाही तत्काल रोक्न हाम्रो दलले मागसमेत गर्दछ ।”
यता, आयोगले भने दलको मूल्याङ्कनको नतिजाका आधारमा राज्यबाट प्राप्त हुने सुविधा प्रदान गर्न सहज बनाउन स्वमूल्याङ्कनन कार्यविधि अगाडि ल्याएको दाबी गरेको छ ।
साउन २२ गतेसम्म सुझाव दिन भनिएको कार्यविधिको मस्यौदामा यस प्रकारको दाबी गरिएको छ :
दलले कानुनबमोजिम गर्नुपर्ने कामकारबाही सञ्चालन गर्न
दलले कानुनबमोजिम पालना गर्नुपर्ने कामकारबाहीको स्वमूल्याङ्कन गरी दलको आन्तरिक लोकतन्त्रलाई मजबुद बनाउन,
दलले आफ्नो भावी रणनीति तयार गर्न सहयोग पु¥याउन
दलको मूल्याङ्कनको नतिजासँग अन्य विषयलाई आबद्ध गर्न
दलको सबल तथा कमजोर पक्षको पहिचान गरी कार्य सम्पादनमा सुधार गर्न
दलको समावेशी सङ्गठनात्मक संरचना निर्माण गर्न
दलको वित्तीय अवस्थालाई पारदर्शी बनाउन,
राजनीतिक दलका अन्य आवश्यक कार्य गर्न सहज बनाउन
कार्यविधिको सवालमा सबै राजनीतिक दलहरूले विरोध व्यक्त गरेका छन् ।
