इक्वेडर । इक्वेडरको तटीय क्षेत्रमा आइतबार भएको दुई छुट्टाछुट्टै आक्रमणमा परी एक बालकसहित कम्तीमा १४ जना सर्वसाधारणको मृत्यु भएको अधिकारीहरूले बताएका छन् ।
गत वर्षको सुरुमा राष्ट्रपति ड्यानियल नोबोआले संगठित अपराधविरुद्ध युद्धको घोषणा गरेयता सन् २०२४ मा प्रति एक लाख मानिसमा ३८ जनाको हत्या भएको यो देश यस क्षेत्रको सबैभन्दा हिंसात्मक मुलुकमध्ये एक बनेको छ ।
प्रारम्भिक आक्रमणपछि दक्षिणपश्चिमी शहर एल एम्पाल्मेका प्रहरी प्रमुख मेजर ओस्कार भ्यालेन्सियाले पत्रकारहरूलाई भने, “हामीकहाँ करिब १२ जनाको मृत्यु भएको छ भने तीन जना घाइते भएका छन्।
सोही आक्रमणकारीले दोस्रो समूहमाथि गोली चलाउँदा थप दुई जनाको मृत्यु भएको उनले बताए । भ्यालेन्सियाका अनुसार दुईवटा पिकअप ट्रकमा आएका आक्रमणकारीले ‘पेस्तोल र राइफल’ले आक्रमण गरेका थिए। ‘उनीहरूले सबैमाथि गोली चलाएका थिए’, उनले भने, ‘मृतकमध्ये १२ वर्षीय बालक पनि थिए।
एउटा रक्सी पसलको प्रवेशद्वारमा शवहरू राखिएको थियो भने दर्जनौं आफन्तहरू फुटपाथमा रोइरहेका थिए ।
