मूल प्रवाह अखिल भारत नेपाली एकता समाजले असामाजिक गतिविधि नियन्त्रण गर्न सहयोग गर्ने भएको छ ।
हैदरावादमा केही नेपाली चोरीडकैती, लुटपाटमा संलग्न भएपछि मूल प्रवाहले प्रशासनलाई सो आश्वासन दिएको हो ।
मूल प्रवाहक केन्द्रीय प्रतिनिधि के रतन सिंह तथा हैदरावादका पूर्वी जोनका डेपुटी कमिस्नर बी बालास्वामी र अतिरिक्त डेपुटी कमिस्नर जी नरसिंहासित अम्बरपेटस्थित कमिस्नर कार्यालयमा जुलाई १७, २०२५ का दिन बैठक गर्दै मूल प्रवाहले प्रशासनलाई सघाउने बताइएको छ ।
बैठकमा केन्द्रीय प्रतिनिधि सिंहले बोल्दै कुनै पनि असामाजिक तत्त्वले चोरीडकैती वा लुटपाट गरेको खबर मूल प्रवाहको जानकारीमा आए दोषीलाई पक्रन वा कारबाही गराउन सक्दो सहयोग गर्ने बताउनुभयो ।
उहाँले भन्नुभयो– ‘तर चोर वा दोषीलाई पक्रने बहानामा आम नेपाली नागरिकलाई पुलिस–प्रशासनले प्रताडित नगरोस् ।’
बैठकमा मूल प्रवाह क्षेत्रीय समितिका अध्यक्ष रामप्रसाद पौडेल, उपाध्यक्ष खिमबहादुर विक र सदस्य वीरबहादुर विक पनि सहभागी हुनुहुन्थ्यो ।
हैदरावादमा गत केही समयदेखि नेपालीभाषीसमेत चोरीडकैती र लुटपाट बढदै गएको बताइएको छ । त्यस क्रममा गत अप्रिल २१ का दिन नेपालीभाषीले नै काचिगुडा पुलिस स्टेसन परिसरमा करिब पाँच करोड सुन र नगद चोरी गरेका थिए ।
सो सम्बन्धमा पुलिस–प्रशासनले चोर पक्रिन असफल भएको र सो घटनाको सन्दर्भमा नेपालीभाषीमाथि धरपकड हुने सम्भावनामाझ मूल प्रवाहले सो कार्यक्रम सम्पन्न गरेको बताइएको छ ।
