काठमाडौँ । अमेरिकी तथा इजरायली साम्राज्यवादले प्यालेस्टाइन र इरानलगायत माथि थोपरेको युद्धको विरोध गर्दै नेपालका १२ राजनीतिक दल तथा संस्थाले जुलुससहित प्रदर्शन गरेका छन् ।
२०८२ असार २७ गते शुक्रबार रत्नपार्क शान्टिवाटिका, जमल, बागबजार, पुतलीसडक हुँदै अगाडि बढेको जुलुस भृकटीमण्डपमा विरोधसभासहित सो कार्यक्रम सम्पन्न भएको हो ।
कार्यक्रमलाई राष्ट्रिय जनमोर्चाका अध्यक्ष तथा प्रतिनिधिसभाका सांसद चित्रबहादुर केसी, नेकपा (माओवादी केन्द्र) का नेता लीलामणि पोखरेल, नेकपा (एकीकृत समाजवादी) का उपाध्यक्ष राजेन्द्र पाण्डे, जनता समाजवादी पार्टी नेपालका नेता तथा राष्ट्रियसभाका सांसद खालिद सिद्दिकी, नेपाल कम्युनिस्ट पार्टीका चिरन सी, जनता समाजवादी पार्टीका राजु थापा, क्रान्तिकारी कम्युनिस्ट पार्टीका रामसिंह श्रीस, वैज्ञानिक समाजवादी कम्युनिस्ट पार्टीका महासचिव विश्वभक्त दुलाल आहुति, नेकपा (बहुमत) का सागर लिम्बु, देशभक्त समाजवादी मोर्चाका गोपाल किराँती र राजनीतिक संवाद थालनी अभियानका संयोजक सङ्गीत स्रोताले मन्तव्य राख्नुभएको थियो ।
नेकपा (मसाल) का नेता समीर सिंहको सञ्चालन तथा नेपाल कम्युनिस्ट पार्टीका अध्यक्ष ऋषि कट्टेलको अध्यक्षतामा अघि बढेको सो कार्यक्रममा स्वागत मन्तव्य जनता समाजवादी पार्टीका लालबहादुर तामाङले राख्नुभएको थियो ।
कार्यक्रममा सुशेला सङ्गीत समूह, रक्तिम सांस्कृतिक अभियानका महासचिव हेमराज आश्रम, जनवादी सांस्कृतिककर्मी कुश्मिता दर्लामीलगायतले साङ्गीतिक प्रस्तुति दिनुभएको थियो ।
कार्यक्रममा आयोजक संस्थाका ठुलो सङ्ख्यामा नेताकार्यकर्ताहरूको सहभागिता रहेको थियो ।
