सरोज न्यौपाने, प्युठान ।
प्युठानको गौमुखी गाउँपालिका–४ पुजाका २३ वर्षीय दुर्गा विक क्वारेन्टिनबाट भागेका छन् । मानसिक सन्तुलन ठिक नभएका विकको उचित उपचार र निगरानी नराखिएका कारण क्वारेन्टिनबाट भागेका हुन् ।
पटक पटक क्वारेन्टिनबाट भाग्ने गरेका ति युवालाई प्रहरीले खोजी गरी स्थानीय क्वारेन्टिनमा बुझाएपनि उचित उपचार र निगरानी नहुँदा भागेका युवाका कारण कोरोना संक्रमणको जोखिम बढेको भन्दै स्थानीय त्रसित बनेका छन् ।
यही जेठ १९ गते भारतबाट आफ्नो भाइ रन्जितसँगै प्युठान आएका उनलाई गौमुखी गाउँपालिका–४ पुजामा रहेको महेन्द्र माविस्थित क्वारेन्टिनमा राखिएकोमा त्यहाँबाट भागेका थिए ।
पहिलो पटक भागेका उनलाई गौमुखी गाउँपालिका ७ स्थित पातिहाल्नाबाट प्रहरीले नियन्त्रणमा लिएर पुनः क्वारेन्टिनमा राखेको थियो । त्यसक्रममा उनले प्रहरीमाथि नै दुव्र्यबहार गरेका थिए । उनलाई नियन्त्रणमा लिएर सालिबिसौनामा रहेको पुर्ण प्राविको क्वारेन्टाइनमा ल्याई स्वास्थ्य परीक्षण गरिएको थियो ।
आरडीटी पोजेटिभ देखिएका उनलाई २१ गते साँझ पुनः गौमुखी गाउँ पालिका ४ स्थित पुजामा रहेको क्वारेन्टिनमा ल्याइएकोमा भोलिपल्टै फेरि भागेका थिए ।
स्थानीयबासी र प्रहरीको प्रयासमा झिम्रुक गाउँपालिकाको मच्छीमा फेला परेका ती युवकलाई पुनः क्वारेन्टिनको जिम्मा लगाइयो । तर उनी फेरि त्यहाँबाट पनि भागेका छन् ।
वार्ड कार्यालयको लापरबाहीका कारण क्वारेन्टिनबाट युवक भागेको भन्दै स्थानीयबासी आक्रोसित बनेका छन् । उनलाई तत्काल नियन्त्रणमा लिएर कोरोना परीक्षण र स्वास्थ्य उपचार गर्न स्थानीयले माग गरेका छन् ।
