धनबीर पुन, नयाँ दिल्ली (भारत) ।
कोरोना संक्रमणका कारण भारतको मुम्बईमा एक नेपालीको मृत्यु भएको छ । मृतक रुपन्देही जिल्लाको देवदह नगरपालिका– १० निवासी थापा थरका ५७ वर्षीय पुरुष हुन् ।
मुम्बई उल्लास नगर सरकारी अस्पतालका अनुसार कोरोना संक्रमण भइ उपचाररत उनको निधन ३० मे का दिन भएको हो । अस्पतालले जारि गरेको मृत्यू सर्टिफिकेटमा मृतक मुम्बई ठाने जिल्लाको अमरनाथमा रहँदै आएको उल्लेख छ ।
मूल प्रवाह अखिल भारत नेपाली एकता समाजमा सो घटनाको जानकारी प्राप्त हुनासाथ मध्य पश्चिम भारत क्षेत्रीय समितिका सचिव मोहन ठकुल्ला सत्यतथ्य जानकारीका लागि सो क्षेत्रमा खटिनु भएको थियो ।
मुम्बईमा समुन्द्री तुफान आउने भनी सरकारले हाइ अलर्ट जारी गरिरहेको परिवेशमा पनि मूल प्रवाहका कार्यकर्ताहरु निरन्तर र सक्रियता पूर्वक खटिई मृतकको बारेमा जानकारी प्राप्त गरि केन्द्रीय कार्यालयमा जानकारी गराएका छन् ।
घटनाको सम्पूर्ण जानकारी गुडगाउमा रहेको मृतकका आफन्तले घरसम्म पनि समाचार पठाई सकिएको मूलप्रवाहले जनाएको छ ।
एम्स अस्पतालमा ४८० जना संक्रमित
भारतको राजधानी शहरमा अवस्थित अल ईन्डिया मेडिकलका १९ डाक्टर र ३८ नर्सहरु सहित ४८० जना कोरोना संक्रमित भएको भारतीय सञ्चार माध्यमले जनाएका छन् ।
समाचार अनुसार २ फेकेल्टी डाक्टर (प्रोफेसर), १७ रेजिडेण्ट डाक्टर, ३८ नर्स, १४ ल्याब टेक्निसियन, ७५ अटेन्डन्ट (नर्स असिस्टेन्ट), ५४ सफाई कर्मचारी, ७५ सुरक्षा गार्ड लगायत उनका परिवारका सदस्य सहित ४८० भन्दा बढि कोरोना संक्रमित भएको बताइएको छ ।
भारतमा दुई लाख १६ हजार संक्रमित
भारतमा अहिलेसम्म संक्रमितको संख्या २ लाख १६ हजार ९१९ पुगेको अधिकारीहरुले जानकारी दिएका छन् । कोरोनाभाइरसबाट संक्रमित भएर भारतमा अहिलेसम्म ६ हजार ७५ जनाको मृत्यु भइसकेको छ ।
भारतको केन्द्रीय स्वास्थ्य तथा परिवार कल्याण मन्त्रालयले दिएको जानकारीअनुसार देशभरी अहिले पनि १ लाख ६ हजार ७३७ जना सङ्क्रमित अवस्था मै रहेका छन् । त्यसैगरी १ लाख ४ हजार १०७ जना संक्रमण मुक्त भएर घर फर्किसकेको स्वास्थ्य अधिकारीहरुले बिहीबार बताएका छन् ।
मन्त्रालयको तथ्यांक अनुसार अहिलेसम्म सवैभन्दा धेरै संक्रमितको संख्या महाराष्ट्र प्रदेशमा रहेको छ । महाराष्ट्रमा मात्रै ७४ हजार ८६० जना सङ्क्रमित भएका छन् । दोस्रो धेरै संक्रमित रहेको तमिलनाडु प्रदेशमा २५ हजार ८७२ जना सङ्क्रमित रहेको मन्त्रालयले जनाएको छ । दिल्लीमा २३ हजार ६४५ जना संक्रमित रहेका छन् ।
