पान्डिचेरी (भारत) । भारतको पान्डिचेरीमा मूल प्रवाह अखिल भारत नेपाली एकता समाजले ऐक्यबद्धता कार्यक्रम सम्पन्न गरेको छ ।
राष्ट्रिय जनमोर्चाद्वारा देशव्यापी रूपमा सञ्चालन गरिरहेको प्रतिगामी खतरा विरुद्धको कार्यक्रप्रति ऐक्यबद्धता जनाउँदै मे ११, २०२५ का दिन सो कार्यक्रम सम्पन्न गरिएको हो ।
कार्यक्रमलाई सम्बोधन गर्दै केन्द्रीय सदस्य तथा दक्षिण भारत क्षेत्रीय समितिका सचिव जनकराज पौडेलले नेपालमा प्रतिगामी खतराको सिर्जना सत्ताधारी दलका कुशासनका कारण भएको बताउनुभयो ।
एक्काइसौँ शताब्दीका जनताका लागि प्रतिगमन वा सडेगलेको असफल राजतन्त्रात्मक व्यवस्था स्वीकार्य नहुने बताउँदै उहाँले यो व्यवस्थाका गलत पक्षको भण्डाफोर गर्दै आन्दोलनका उपलब्धिको रक्षा गरी यो भन्दा उन्नत व्यवस्थाको आधार तयार पार्नु आवश्यक रहेको उहाँको धारणा थियो ।
अर्का अतिथि केन्द्रीय सदस्य चन्द्रकान्त शर्माले नेपालमा निरङ्कुश राजतन्त्रात्मक व्यवस्था र २०४६ सालको आन्दोलनपछिका दलीय सरकारले राजनीतिक अस्थिरता फैलाएको बताउनुभयो ।
सभालाई क्षेत्रीय सदस्य विष्णुकुमारी शर्मा, गमबहादुर विक, नगर सदस्य तथा दक्षिण टाउन एरियाका सविता विक, महिला विभागकी जमुना शर्मा, दक्षिण टाउन एरियाका दीपक पौडेल, उत्तर टाउन एरियाका बमबहादुर केसी, मुदलियरपेट एरियाकाट शीतल गायकलगायतले मन्तव्य राख्नुभएको थियो ।
गोविन्द शर्माको अध्यक्षता, रवि शर्माको सञ्चालन र नगर सदस्य बलबहादुर केसीको स्वागत मन्तव्यसँगै सो कार्यक्रम सम्पन्न भएको थियो ।
