काठमाडौँ । ललितपुरको मंगलबजारमा आफ्नै बहिनीको हत्या गरेको आरोपमा दाजु पक्राउ परेका छन्।
ललितपुर महानगरपालिका–१२, मंगलबजार बस्ने भगवती बोहराकी छोरी वर्ष ११ की दुर्गा बोहराको हत्या गरेको आरोपमा उनकै १५ वर्षीय दाजु पक्राउ परेका हुन्।
काठमाडौँ उपत्यका अपराध अनुसन्धान कार्यालयका अनुसार गत चैत ४ गते राति अन्दाजी ९ः३० बजेबाट दुर्गा हराएको भनि जिल्ला प्रहरी परिसर ललितपुरमा पीडित परिवारले निवेदन दिएका थिए।
खोजतलास गर्ने क्रममा चैत २९ गते ललितपुर–९, खपिन्छेँ स्थित बाबुराजा अवालेको पुरानो घरको भुईं तलामा रहेको पानी ट्याङकीमा सडेगलेको अवस्थामा शव फेला परेको अपराध अनुसन्धान कार्यालयले जनाएको छ।
अनुसन्धानका क्रममा उक्त घटना मृतककै कान्छो दाइले कर्तब्य गरी हत्या गरेको खुल्न आएको प्रहरीको भनाई छ।
आरोपी किशोरलाई यही २०८२ वैशाख १ गते ललितपुर मंगलबजार एरियाबाट नियन्त्रणमा लिई आवश्यक कारबाहीको लागि जिल्ला प्रहरी
परिसर ललितपुर पठाइएको प्रहरीले जनाएको छ।
अनुसन्धानबाट खुल्न आएका तथ्यहरुः
मिति २०८१/१२/०६ गते जिल्ला बझाङ सुर्मा गापा वडा नं ०४ घर भई हाल जिल्ला ललितपुर लपुमनपा वडा नं १२ मंगलबजार बस्ने मदन बोहरा र भगवती बोहराको छोरी बर्ष ११ की दुर्गा बोहरा चैत ४ गतेदेखि हराएको ।
आमा भगवती बोहराले छोरी हराएको भनी खोज तलासको लागी जिल्ला प्रहरी परिसर ललितपुरमा निवेदन दिएको ।
मिति २०८१/१२/२९ गते बिहान अ. १०:०० बजेको समयमा जिल्ला ललितपुर लपु मनपा वडा नं ०९ खपिन्छे स्थित बाबुराजा अवालेको ५ तल्ले घरको भुई तल्लामा रहेको प्रयोग बिहिन सिमेन्टले बनाएको पानी ट्याङ्किमा दुर्गा बोहराको लाश फेला परेको ।
बाबुराजा अवालेको उक्त घरमा मृतकहरु भाडामा बसेको र मिति २०८१।११।२५ गते अन्यत्र डेरा सरेको ।
उक्त घरमा भाडामा बस्ने अर्को चमेली सुनारको परिवार पनि मिति२०८१।१२।०२ गते अन्यत्र डेरा सरे पश्चात सो घरमा कोही नबसी घर खाली रहेको ।
मिति २०८१।१२।०४ गते मृतक र उनको दाजु पहिला डेरामा बस्ने गरेको अवालेको घर तर्फ जाँदै गरेको सीसीटीभी फुटेजमा देखिएको ।
दाजु बहिनी सँगै गएको फुटेज भेटिए पश्चात दाजु माथि शंका लागी सोधपुछ गर्दा उसले कोठा सर्दा छुटेका कपडाहरु लिन भनि दाजु बहिनी गएकोमा सामान्य विवाद हुँदा बहिनीलाई पिटि उक्त ठाउँमा रहेको नाईलनको डोरीले पछाडीबाट घाटी कसेर भुईमा लडाई छोडी भागेको बताएको ।
दाजु बहिनिले नै लागु औषधको ट्याबलेट खाएको थियो र त्यसको नशामा आफू भएकोले त्यस्तो घटना हुन गएको कुरा बताएको ।
मिति २०८१/१२/०५ गते बिहान नशाले छोडे पछि आफूले हिजो बहिनी माथि गरेको आक्रमण सम्झि उक्त घटनास्थलमा गई हेर्दा बहिनीको मृत्यु भएको र बहिनीको लाश भुई तल्लाको भर्याङको छेउमा देखे पश्चात सो लाश ट्याङ्कीमा हालि सिमेन्टले बनाएको ढक्कन लगाई छोपेर छोडि गएको बताएको ।
