काठमाडौँ । प्रगतिशील पत्रकार सङ्घले राजावादीको प्रेस स्वतन्त्रता विरोधी क्रियाकलापको भर्त्सना गरेको छ ।
आज (चैत १५ गते) राजावादी आन्दोलनको क्रममा एक जना पत्रकारको ज्यान गएको, कतिपय घाइते भएको तथा सञ्चार जगतमाथि तोडफोड भएको घटनाको सन्दर्भमा प्रगतिशीलले सो धारणा व्यक्त गरेको हो ।
अध्यक्ष श्यामलाल पोखरेलको हस्ताक्षरमा २०८१ चैत १५ गते शुक्रबार प्रेसवक्तव्य जारी गर्दै प्रगतिशीलले संविधानमा पूर्ण प्रेस स्वतन्त्रताको व्यवस्था भएसँगै त्यसलाई मौलिक हकको रूपमा घोषणा गरिएको स्मरण गराएको छ ।
निर्भयपूर्वक समाचार सङ्कलन तथा प्रकाशन/प्रसारणमा अवरोध सिर्जना गर्ने राजावादी क्रियाकलापको विरोध गर्दै प्रगतिशीलले ज्यान गुमाएका पत्रकारको परिवारलाई क्षतिपूर्ति, घाइतेको निःशुल्क उपचार, तोडफोडबाट भएको क्षतिबापत क्षतिपूर्ति र दोषीमाथि कानुनी कारबाही गर्न सरकारसित माग गरेको छ ।
यस्तो छ, प्रेसवक्तव्यको पूर्ण पाठ :
“राजावादीहरूको आज (२०८१ चैत १५ गते) को उग्र तथा हिंस्रक आन्दोलनको निसानामा समग्र सञ्चार जगत् परेको छ । त्यस क्रममा एभिन्युजका क्यामेरा पर्सन सुरेश रजकको आगलागी परी दुखद निधन हुन पुगेको छ भने अनलाइन खबर डट कमका पत्रकार दिनेश गौतमको खुट्टा भाचिएको छ । राजावादीका यस्ता उग्र तथा ह्रिसक गतिविधिको मारमा कान्तिपुर, अन्नपूर्ण पोस्ट, हिमालय टेलिभिजन, अनलाइनखबर डट कम, सेटो पाटी डट कमसहित सम्पूर्ण सञ्चार जगत् परेको छ । राष्ट्रिय मानवअधिकार आयोगले आजको घटनालाई मानवअधिकार उल्लङ्घन ठहर गरेको छ ।
नेपालको संविधान–२०७२ ले पूर्ण प्रेस स्वतन्त्रताको ग्यारेन्टी गरेको छ । त्यस्तै संविधानमा प्रेस स्वतन्त्रतालाई मौलिक हकसमेत मानिएको छ । यो अवस्थामा प्रेस जगत्ले देशभित्र निर्भयपूर्ण वातावरणमा समाचार सङ्कलन तथा प्रकाशन/प्रसार गर्न पाउनुपर्दछ तर आज राजावादीहरूले प्रेस जगतलाई त्यो अधिकारबाट पूरै वञ्चित गरेका छन् । हाम्रो सङ्गठन राजावादीहरूको यस खालको प्रेस स्वतन्त्रता विरोधी क्रियाकलापको कठोर शब्दमा भर्त्सना गर्दछ ।
हाम्रो सङ्गठन सञ्चारकर्ममै रहेका बेला ज्यान गुमाउनुभएका पत्रकारको परिवारलाई क्षतिपूर्ति, घाइते पत्रकारको निःशुल्क उपचार, सञ्चार जगतमाथि भएको तोडफोडका लागि क्षतिपूर्तिका साथै यस खालका घटनामा संलग्न दोषीमाथि छानबिन गरी कानुनअनुसार कारबाही गर्नका लागि सरकारसित माग गर्दछ ।”
