काठमाडौँ । गुल्मीको रुद्रावती बहुमुखी क्याम्पसमा बाँकी रहेको मतदान कार्य सम्पन्न अखिल (छैठौं) ले माग गरेको छ ।
कुल १५९ मतदातामध्ये १०७ जनाले मतदान गरिसकेपछि निर्वाचन स्थगित गरेकोमा युनियनले सो माग गरेको हो ।
२०८१ चैत ५ गते अध्यक्ष सुवास जिसीले जारी गर्नुभएको प्रेसवक्तव्यमा सत्ता सञ्चालक दलको विरुद्ध परिणाम जाने निश्चित भएपछि निर्वाचन स्थगित गरिएको आरोप लगाइएको छ ।
क्याम्पस प्रशासन, निर्वाचन समिति र सत्तधारी विद्यार्थी गठबन्धनको सो कार्यलाई युनियनले गैरकानुनी, अन्यायी, धाँधलीपूर्ण, पक्षपाती र हद दर्जाको निकृष्ट कार्य बताएको छ ।
यस्तो छ, प्रेसवक्तव्यको पूर्ण पाठ :
“रुद्रावती बहुमुखी क्याम्पस गुल्मीमा आज चैत ५ गते भइरहेको स्वतन्त्र विद्यार्थी युनियनको निर्वाचनका क्रममा दिउँसो करिब साढे एक बजेपछि क्याम्पस प्रशासन र निर्वाचन समितिले एकाएक चुनाव स्थगित गरेको घटनाप्रति हाम्रो सङ्गठनको गम्भीर ध्यानाकर्षण भएको छ ।
उक्त क्याम्पसमा सत्तागठबन्धनका अनेरास्ववियु र नेपाल विद्यार्थी सङ्घको संयुक्त प्यानलको विरुद्ध अखिल (छैठौं) एकल रूपमा लडेको थियो । १५८ जना मतदाता रहेको क्याम्पसमा दिउँसो १०७ जनाले मतदान गरिसकेको स्थिति थियो । निर्बाध रूपमा निकै शान्तिपूर्ण तरिकाले अगाडि बढेको निर्वाचन एकाएक रोक्ने काम भयो । अखिल (छैठौं) का सभापतिका उम्मेदवार कर्ण नेपालीलगायतका उम्मेदवारको जित सुनिश्चित बन्दै गएपछि सत्ता सञ्चालक दल, तिनका प्रशासन र निर्वाचन समितिले बहानाबाजी गरेर एक्कासि निर्वाचन रोक्ने षडयन्त्र गरे, जुन गैरकानुनी, अन्यायी, धाँधलीपूर्ण, पक्षपाती र हद दर्जाको निकृष्ट कार्य हुन पुगेको छ ।
क्याम्पस प्रशासन, निर्वाचन समिति र सत्ताधारी विद्यार्थी सङ्गठनको गठबन्धनवाट विद्यार्थीको हक खोस्ने, मतदानको अधिकार लुट्ने, आफू र आफ्ना विद्यार्थी सङ्गठनले हार्ने भएपछि चल्दै गरेको निर्वाचन एकाएक रोक्नेजस्तो नाटकीय काम निकै लज्जास्पद र घृणित दुष्कर्म हो । यस्ता कर्म अखिल (छैठौं) लाई किमार्थ स्वीकार्य छैन ।
हामीले उक्त क्याम्पस प्रशासन र निर्वाचन समितिलाई बाँकी रहेका मतदातालाई तुरुन्त भोट हाल्ने व्यवस्था गरी मतगणना गर्न हार्दिक अनुरोध गर्दछौँ । हाम्रो अनुरोधलाई बेवास्ता गरी अन्य कुनै कदम चालेमा अखिल (छैठौं) ले कानुनी तथा आन्दोलनका अन्य बाटा प्रयोग गर्ने चेतावनी दिन चाहन्छौँ । त्यसबाट हुने क्षतिको जिम्मेवार क्याम्पस प्रशासन र निर्वाचन समिति हुनेछ ।”
