काठमाडौँ । पृथ्वीनारायण क्याम्पस पोखरामा आज हुन गइरहेको स्ववियु निर्वाचनमा अखिल (छैठौं) को मतसङ्केत गर्ने स्थान नराखिएपछि सो घटनाप्रति कडा आपत्ति प्रकट गर्दै निर्वाचन स्थगित गर्न माग गरिएको छ ।
अध्यक्ष सुवास जिसीद्वारा २०८१ चैत ५ गते जारी प्रेसवक्तव्यमार्फत् युनियनले सो माग गरेको हो ।
क्याम्पस प्रशासन र निर्वाचन समितिले विभेद र पूर्वाग्रह रवैयाँ व्यक्त गरेको भन्दै अखिल (छैठौं) ले यो कार्यलाई गैरजिम्मेवार पनि बताएको छ :
यस्तो छ, वक्तव्यको पूर्ण पाठ :
“पृथ्वीनारायण क्याम्पस पोखरामा आज चैत ५ गते हुन गइरहेको स्ववियु निर्वाचनमा निर्वाचन समितिले तयार गरेको मतपत्रमा अखिल (छैठौं) को तर्फबाट सभापतिको उम्मेदवार मिलन सुनारको पक्षमा मतदान गर्ने ठाउँ नराखिएकोप्रति हाम्रो सङ्गठन गम्भीर आपत्ति प्रकट गर्दछ ।
निर्वाचन समितिले निर्वाचनको क्रममा अखिल (छैठौं) प्रति बारम्बार पूर्वाग्रह साँध्ने काम गरेको छ । क्याम्पस प्रशासन र निर्वाचन समितिको यो प्रकारको विभेद र पूर्वाग्रहको हामीले घोर निन्दा एवम् भर्त्सना गर्दछौँ । निष्पक्ष र धाँधलीरहित निर्वाचन गराउने जिम्मा पाएको निर्वाचन समितिले मतपत्रमै मतदान गर्ने ठाउँ नराख्ने कार्य निकै नै गैरजिम्मेवारपुर्ण कार्य हो ।
हामीले पृथ्वीनारायण क्याम्पसको आजको निर्वाचन तुरुन्त स्थगित गरी निष्पक्ष निर्वाचन गर्न जोडदार माग गर्दछौँ । हाम्रो मागलाई व्यवास्था गरेमा कडा आन्दोलनमा जाने चेतावनी दिन चाहान्छौँ ।”
