मेघराज रिष्मेली, टोकियो ।
राष्ट्रिय जनमोर्चाकी उपाध्यक्ष तथा प्रवक्ता दुर्गा पौडेलले समानताको लडाइँ महिलापुरुष दुवैले मिलेर लड्नुपर्ने बताउनुभएको छ ।
जापान नेपाली एकता समाजद्वारा एक सय पन्ध्रौँ अन्तर्राष्ट्रिय श्रमिक महिला दिवसको अवसरमा आयोजित कार्यक्रममा प्रमुख अतिथिको आसनबाट बोल्दै उहाँले यस्तो आवश्यकतामा जोड दिनुभएको हो ।
उपाध्यक्ष पौडेल २०८१ फागुन २४ गते (मार्च ८, २०२५) साँझ भर्चुअल माध्यमबाट आयोजित कार्यक्रममा सम्बोधन गर्दै हुनुहुन्थ्यो ।
‘समाजका महिला र पुरुषको सम्बन्ध भनेको एउटा सवारीसाधनको दुई चक्काजस्तै हो’ उहाँले भन्नुभयो– ‘त्यसैले समानताको यो लडाइँ दुवैले मिलेर लड्नुपर्छ ।’
उहाँले समाजमा महिलालाई महिला भएर मात्रै होइन, मान्छे भएर बाँच्न पाउने अधिकार हुनुपर्ने बताउनुभयो ।
‘समानताका प्र्रत्येक आन्दोलनमा हामीले पुरुषसँगै मिलेर थुप्रै सङ्घर्ष गरेका छौँ । त्यसैले त्यसको प्रतिफल महिलाले पनि पाउनुपर्दछ’ उहाँको भनाइ थियो ।
हिजोको व्यवस्था र आजको अवस्था फरक भएको बताउँदै उहाँले नारीहरूले हिजोको सतीप्रथाजस्तो प्रथा समाप्त पारे भने अब अझै नयाँ अधिकारका निमित्त एकजुट हुनुपर्ने बताउननुभयो ।
देशमा हिजो राजतन्त्र हुँदा महिलालाई मान्छेको रूपमा नगनिने अवस्था रहेको स्मरण गर्दै उहाँले फेरि त्यही व्यवस्था फर्काउन एउटा शक्ति लागेकाले त्यो आन्दोलनमा महिलाहरू पनि जोडिनुपर्ने आवश्यकतामा जोड दिनुभयो ।
उहाँले नेपालका देशका युवाविद्यार्थी विदेशतर्फ होइन, देशमै बस्नुपर्नेमा जोड दिनुभयो ।
‘विदेशीहरू नेपालमा के छ भनेर खोज्दै आउने गर्छन् भने हामी किन विदेश जाने ?’ उहाँको प्रश्न थियो ।
विदेशमा बस्ने नेपालीहरू अन्तिममा देशमै फर्किनुपर्छ भन्ने उदाहरण अहिले अमेरिकामा ट्रम्प राष्ट्रपति भएपछि विभिन्न बहानामा विदेशी नागरिकलाई फिर्ता पठाइएकोबाट पुष्टि भएको उहाँको भनाइ थियो ।
‘त्यसैले देशको माया नमारौँ, स्वदेशमा रहँदै सङ्घर्ष गरौँ’ पौडेलले भन्नुभयो ।
कार्यक्रममा अखिल नेपाल महिला सङ्घकी कोषाध्यक्ष ऋतु केसी, अन्तर्राष्ट्रिय नेपाली एकता समाजका अध्यक्ष शक्तमान बुढाथोकी, जापान नेपाली एकता समाजका कावा अध्यक्ष दण्ड केसी र कतार महिला विभागकी संयोजक जमुना बस्नेतले पनि मन्तव्य राख्नुभएको थियो ।
सो अवसरमा एकता समाजका महासचिव तेजेन्द्र क्षेत्री, रक्तिम सांस्कृतिक अभियान जापानका अध्यक्ष टिका केसी, एकता समाज खानसाई क्षेत्रीय समितिका अध्यक्ष गोपालकृष्ण सापकोटा, कान्तो क्षेत्रीय समितिका अध्यक्ष नारायण कँडेल, कतार नेपाली एकता समाजका अध्यक्ष रामप्रसाद पराजुली र युएई नेपाली एकता समाजका कृष्ण भुसालको आतिथ्य रहेको थियो ।
रेणु गुरुङको अध्यक्षता तथा सुमित्रा गौतमको सञ्चालन रहेको उक्त कार्यक्रममा उपस्थित जनसमुदायलाई जमुना लामिछाने सापकोटाले स्वागत गर्नुभएको थियो ।
