खिमराज चालिसे, चन्डिगढ (भारत) ।
भारतको राजस्थान श्रीगङ्गानगरमा सडक दुर्घटनामा परी गम्भीर घाइते भएका २४ वर्षीय सुरज भुसालको उपचारार्थ मूल प्रवाह अखिल भारत नेपाली एकता समाजले ६० हजार नेरु सहयोग गरेको छ ।
मार्च ८, २०२५ का दिन मूल प्रवाहले सो सहयोग गरेको हो ।
प्युठान जिल्ला झिमरुक गाउँपालिका–६ अर्गेली स्थाई निवासी माधुलाल भुसालका छोरा सुरज भुसाल गत सेप्टेम्बर १७, २०२४ को मोटरसाइकल दुर्घटनामा परी दुबै खुट्टा गुमाएका थिए । पीडित सुरज भुसालको आर्थिक अवस्था कमजोर रहेको थाहा पाएपछि मूल प्रवाह श्रीगङ्गानगर नगर समितिले आर्थिक सङ्कलन गरी उपचारार्थ भारु ३७ हजार पाँच सय १० अर्थात् नेरु साठी हजार सोर रुपैयाँ सहयोग गरेको थियो ।
पीडितलाई केन्द्रीय सचिव त्रिभुवन भट्टराई, केन्द्रीय सदस्य कृष्ण जिसी, सुदूर पश्चिमोत्तर क्षेत्रीय सदस्य एवम् नगर अध्यक्ष गिरुप्रसाद न्यौपाने, महिला क्षेत्रीय सदस्य बसन्ता नेपाली, समता क्षेत्रीय संयोजक हुमबहादुर विकलगायतका कार्यकर्ताले सङ्कलित रकम पीडितकी आमा कमला भुसाललाई हस्तान्तरण गर्नुभएको थियो ।
