रामप्रसाद पौडेल, हैदरावाद (भारत) ।
बर्दिया जिल्लाको गेरुवा–४ मा निवासी सम्पती धामीका ४२ वर्षीय छोरा रणबहादुर धामीको भारतको तेलङ्गानाको मेहदिपट्नममा निधन भएपछि दुई लाख सत्तरी हजार रुपियाँ क्षतिपूर्तिसहित दाहसंसकार गरिएको छ ।
मूल प्रवाह अखिल भारत नेपाली एकता समाजसमेतले समेतको पहलमा धामीको दाहसंसकार गरिएको हो ।
कबिर क्लासिक अपार्ट्मेन्टमा कार्यरत रहेका धामीको मार्च ५, २०२५ का दिन निधन भएको थियो । सोही दिन बेलुकी करिब ८ बजे अपार्टमेन्टको पाँचौँ तला माथिबाट तल खस्दा उहाँको घटनास्थलमै मृत्यु भएको बताइएको छ ।
उस्मानिया अस्पतालमा निजको शव पुर्याएपछि मार्च ६ का दिन घटनाको जानकारी मध्यदक्षिण क्षेत्रीय समितिका अध्यक्ष रामप्रसाद पौडेललाई प्राप्त भएको थियो । त्यसलगत्तै क्षेत्रीय सचिवालय सदस्य तथा दक्षिण हैदराबाद नगर समितिका अध्यक्ष रतन सिंहसहितको टोली अस्पताल घटनास्थलमा पुगेको थियो ।
टोलीमा जनसम्पर्क समितिका जनक बोगटी, बस व्यवसायी लक्ष्मण जोशी, समाजसेवी रुद्र चलाउने, प्रभु मनिट्रान्सफर हैदरावादका मार्केटिङ म्यानेजर अजित बोगटी र समाजसेवी शिवप्रसाद भण्डारीलगायतको उपस्थिति रहेको थियो ।
उक्त टोलीले अपार्टमेन्ट प्रबन्धकसँग वार्ता गरी मृतकको परिवारलाई क्षतिपूर्तिस्वरूप दुई लाख पचास हजार रुपैयाँ र दाहसंस्कार खर्चस्वरूप बिस हजार गरी जम्मा दुई लाख सत्तरी हजार रुपियाँ दिलाएको छ । तत्पश्चात् आवश्यक कानुनी प्रावधान पूरा गरी मृतकको दाहसंस्कार गरिएको थियो ।
