धनगढी । रुकुममा तीन जनाको ज्यान जाने गरी भएको जातीय हिंसाको घटनाविरुद्ध कैलालीमा प्रदर्शन भएको छ । जातीय समता समाज सुदूरपश्चिम प्रदेश समितिको आयोजनामा कैलालीको अत्तरियामा कोण सभा गरी घटनाको विरोध गरेको हो ।
कोणसभालाई राष्ट्रिय जनमोर्चाका केन्द्रीय सदस्य तथा सुदूर पश्चिम प्रदेश समितिका अध्यक्ष नन्दराज भट्टले सम्बोधन गर्दै घटनामा २१औं शताब्दिको बर्बर र घृणित घटना भएको बताउनुभयो । उहाँले घटनाको जति निन्दा गरेपनि कम हुने भन्दै संलग्नमाथि कडा कारबाही गर्न माग गर्नुभयो ।
यस्तै, जातीय समता समाजका महासचिव गोबिन्द विकले घटनाको निन्दा गर्नुभएको थियो । जतीय समता समाजका सुदूरपश्चिम प्रदेश सचिव कृष्ण विकले कार्यक्रमको सञ्चालन गर्नुभएको थियो ।
अन्तरजातीय प्रेमका कारण रुकुम पश्चिममा दलित जातीका ३ जना ब्यक्तिको गाउँलेहरुले लखेटेर हत्या गरेका थिए भने तीन जना बेपत्ता भएका छन् । घटनामा १२ जना घाइते भएका छन् ।
सो घटनाको विरोधमा संसददेखि सडकसम्म विरोध प्रदर्शन भएको छ । आजै कालीकोटका स्थानीयले प्रदर्शन गरी घटनामा संलग्नलाई कडा कारबाही गर्न माग गरेका छन् ।
