काठमाडौँ । अखिल (छैठौं) का अध्यक्ष सुवास जिसीले राज्यको नालायकीपनका कारण विदेशमा नेपालीहरू हेपिनुपरेको बताउनुभएको छ ।
बुधबार चार विद्यार्थी संगठनले लाजिम्पाटस्थित भारतीय राजदूतावास अगाडि विरोध प्रदर्शन गर्दै खबरदारी सभा गरेका छन् ।
उक्त खबरदारी सभालाई सम्बोधन गर्दै अध्यक्ष जिसीले भारतको कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) मा प्रकृति लम्सालको मृत्युपछि नेपाली विद्यार्थीलाई गरिएको अपमानप्रति राज्यले मौनता साँधेको बताउनुभयो ।
‘नेपाली विद्यार्थीलाई अपमानपूर्ण तरिकाले कलेजबाट निकाल्दा प्रधानमन्त्री कहाँ छन् ? परराष्ट्र र गृहमन्त्री कहाँ छन् ?’ अध्यक्ष जिसीको प्रश्न थियो, ‘प्रधानमन्त्री र मन्त्रीहरूको काम फेसबुकमा स्ट्याटस लेख्ने र ट्विट गरेर बस्ने हो ?’
उहाँले देशको शैक्षिक संस्था ध्वस्त पारेर राज्यले नै नेपाली युवा विद्यार्थीहरूलाई विदेश लखेटिरहेको आरोप लगाउनुभयो ।
उहाँले भन्नुभयो, ‘रुस र युक्रेनको युद्ध हुन्छ, मर्छन् नेपाली, इजरायल र प्यालेस्टाइनको युद्धमा पनि नेपाली विद्यार्थी नै मर्छन्। सरकारले नेपालका शैक्षिक संस्था धरासायी पारेर विद्यार्थीलाई बाहिर लखेटिरहेको छ । त्यसकारण संसारभरी नेपालीले अपमान ब्यहोर्नुपरेको छ ।
किटको होस्टेलबाट निकालिएका विद्यार्थीलाई सम्मानपूर्वका सोही विश्वविद्यालयमा पढ्ने वातावरण बनाउन सरकारले पहल गर्नुपर्ने र भारतीय दूतावासले पनि त्यसमा काम गर्नुपर्ने उहाँले बताउनुभयो ।
बुधबार भारतीय दूतावास अगाडि अखिल (छैठौं), मोहन वैद्य नेतृत्वको नेकपा (क्रान्तिकारी माओवादी निकट अखिल क्रान्तिकारी, अखिल क्रान्तिकारी बहुमत र वैज्ञानिक समाजवादी विद्यार्थी संगठनले विरोध प्रदर्शन गरेका हुन् ।
विद्यार्थीहरूले घटनाको निष्पक्ष छानबिन गरी दोषीलाई कडा कारबाही तथा न्यायको माग गरिरहेका नेपाली विद्यार्थीमाथि दुर्व्यवहार गर्ने कलेज प्रशासनका कर्मचारीलाई कडा कारबाही गर्न माग गरेका छन् ।
साथै, होस्टेलबाट अपमानजनक व्यवहार गर्दै निष्कासन गरिएका सम्पूर्ण नेपाली विद्यार्थीहरूलाई ससम्मान होस्टेल फिर्ता गराई पठनपाठनको व्यवस्था गर्न माग गरेका छन् ।
कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) मा प्रकृति लम्सालको मृत्युपछि भएको विवादले उग्ररुप लिएपछि नेपाली विद्यार्थीलाई कुटपिट गर्दै जबर्जस्ती निकालिएको थियो।
तनाव सिर्जना भएपछि १६८ विद्यार्थी स्वदेश फर्किसकेका छन् ।
आइतबार सो विश्वविद्यालयको होस्टेलमा प्रकृतिको मृत्यु भएको थियो।
