नयाँदिल्ली, तस्बिर स्रोत अमरउजाला डट कम ।
मूल प्रवाह अखिल भारत नेपाली समाजको पहलका कारण हिमाचल प्रदेशका आठ जना प्रहरी अधिकारीलाई आजीवन कारावासको सजाय भएको छ ।
एक नेपाली युवकको प्रहरी हिरासतमा कुटपिटबाट हत्या भएको मामिलामा ती अधिकारीलाई सिबिआई अदालतले सो सजाय दिएको हो ।
सिबिआई अदालत चन्डिगढले जनवरी २७, २०२५ का दिन ती आठ प्रहरी अधिकारीलाई आजीवन कारावाससँगै प्रत्येकलाई एक/एक लाख भारु जरिवाना सुनाएको छ ।
अदालतले हिमाचल प्रदेशका आई.जी. जहुर एच जैदी, डिएसपी मनोज जोशी, एसपीहरू रफी मोहम्मद, मोहन लाल, सुरत सिंह, एसआई राजेन्द्र सिंह, एएसआई दीप राम र कन्सटेबल रन्जित स्टेटालाई सो सजाय सुनाएको हो ।
घटना विवरणअनुसार जुलाई ४, २०१७ का दिन हिमाचल शिमलाको कोटखाई महासूस्थित १६ वर्षीया भारतीय किशोरीको बलात्कारपछि हत्या गरेर उनको शव स्थानीय डाँडी जङ्गलमा फ्याँकिएको थियो ।
सो घटनामा प्रहरीले नै बलात्कार गरी हत्या गरेको आशङ्का गरिएको थियो । आई.जी. जहुरको लोकेसन दाँडी जङ्गलमा ट्रेसिङ देखिएको भन्दै सो आरोप लगाइएको थियो ।
यस सम्बन्धमा आई.जी. जहिर नेतृत्वमा हत्या पत्ता लगाउन आठ सदस्यीय छानबिन प्रहरी टोली गठन गरिएको थियो । सोही टोलीले छ जना व्यक्तिलाई गिरफ्तार गरेको थियो । त्यसमध्ये नेपालीभाषी सुरजलाई जुलाई १८ का दिन प्रहरीले हिरासतभित्रै कुटपिट गरी हत्या गरेको थियो ।
यस सम्बन्धमा मूल प्रवाहका तत्कालीन केन्द्रीय अध्यक्ष दुर्गाबहादुर केसी, केन्द्रीय उपाध्यक्ष कपिल खनाल नेतृत्वको प्रतिनिधिमण्डलले दोषी प्रहरीमाथि कारबाही गर्न माग गरेको थियो ।
यसैबिच, यस मामिला सिबिआईसमक्ष पुगेको थियो । साथै यस मामिलालाई शिमलाबाट चन्डिगढ स्थानान्तरण गरिएको थियो ।
सिबिआईले जुलाई २२ का दिन बालिका बलात्कार र सुरजको हत्या सम्बन्धमा मुद्दा दर्ता गरेको थियो । त्यसपछि आठ प्रहरी अधिकारीलाई गिरफ्तार गरियो । पछि उनीहरूलाई केही समयअघि जमानतमा रिहाई पनि गरिएको थियो ।
यस सम्बन्धमा आठै जना प्रहरीलाई सिबिआई अदालतले जनवरी १८, २०२५ का दिन दोषी ठहराएको थियो । त्यसपछि मात्रै सजाय निर्धारण गरेको हो ।
